Մարդիկ պետք է հետագա հազար տարում յուրացնեն տիեզերքը և ապրեն այնտեղ կամ կանհետանան: Independent-ի հաղորդմամբ՝ այս մասին Սիդնեյի օպերային թատրոնում իր դասախոսության ընթացքում ասել է բրիտանացի ֆիզիկոս Սթիվեն Հոքինգը:
«Մենք պետք է մարդկության պահպանման համար շարունակենք առաջ ընթանալ տիեզերքում,- ասել է Հոքինգը:- Չեմ կարծում, որ մենք ևս 1000 տարի կապրենք առանց մեր փխրուն մոլորակի սահմաններից դուրս գալու»:
Նշվում է, որ դասախոսության վերջում Հոքինգն իր ունկնդիրներին կոչ է արել «նայել աստղերին, ոչ թե ներքև՝ իրենց ոտքերին»:
«Փորձեք գլուխ հանել նրանից, ինչ տեսնում եք, և հետաքրքրվել, թե ինչու գոյություն ունի տիեզերքը,- ունկնդիրներին դիմել է նա:- Հետաքրքրասեր եղեք, որքան էլ դժվար թվա կյանքը, միշտ կարելի է ինչ-որ բան անել ու հաջողության հասնել: Կարևորը՝ չհանձնվել»:
Սթիվեն Հոքինգը բազմիցս զգուշացրել է արհեստական ինտելեկտի առաջընթացի և ագրեսիայի ու բարբարոսության ուժեղացման ֆոնին մարդկությանը սպառնացող վտանգի մասին: