Թուրքիայի արտգործնախարարությունը քննադատել է Բուլղարիայի խորհրդարանին՝ Հայոց ցեղասպանության վերաբերյալ ընդունած բանաձևի համար։
ԱԳՆ-ի հայտարարության մեջ, մասնավորապես, ասվում է.
«Բուլղարիայում ծայրահեղ ազգայնական, այլատյաց և ռասիստական հայացքներով աչքի ընկնող «Ատակա» կուսակցության կողմից խորհրդարան ներկայացված բանաձևի ընդունումը Թուրքիայի նկատմամբ ոչ բարեկամական վերաբերմունքի դրսևորում է, և այս զրպարտանքը բացասաբար է անդրադառնալու թուրք-բուլղարական հարաբերությունների վրա։
Հաշվի առնելով այս հանգամանքը՝ այսօր Թուրքիայի ԱԳՆ է կանչվել Անկարայում Բուլղարիայի դեսպանը, որը տեղեկացվել է այս հարցում Թուրքիայի դիրքորոշման վերաբերյալ»։
Հիշեցնենք, որ ապրիլի 24-ին Բուլղարիայի խորհրդարանը բանաձև է ընդունել Հայոց ցեղասպանության տարիներին հայերի զանգվածային սպանության դատապարտման մասին, որում, սակայն, չի կիրառվել «ցեղասպանություն» եզրը: «Ատակա» կուսակցության կողմից խորհրդարան ներկայացված բանաձևի քննարկման արդյունքում ընդունվել է երկրի վարչապետ Բոյկո Բորիսովի՝ «ցեղասպանություն» բառը «զանգվածային սպանդ» բառակապակցությամբ փոխարինելու առաջարկը: Թուրք պատգամավորները բոյկոտել են քվեարկությունն ու լքել դահլիճը։
Թուրքական մամուլում, չնայած այն հանգամանքին, որ ընդունվել է փոխզիջումային բանաձև, Բուլղարիայի խորհրդարանի հասցեին այսօր մի շարք քննադատական հոդվածներ են հրապարակվել։