Թեպետ իշխանափոխության համար պայքարող ազատամարտիկներն ունեն տարաձայնություններ, նրանք բոլորն էլ համակարծիք են, որ Ժիրայր Սեֆիլյանի, Վոլոդյա Ավետիսյանի, Պավլիկ Մանուկյանի և մյուսների ձերբակալությունը քաղաքական դրդապատճառներ ունեն, և որ նրանք քաղբանտարկյալներ են:
Ազատամարտիկներից ոմանք միացել են «Հիմնադիր խորհրդարան»-ի անդամների ազատության համար պայքարին, ոմանք միայն դատապարտող հայտարարություններով են հանդես գալիս, «Ազատամարտիկների դաշինք»-ի անդամներն էլ նախկինում հայտարարում էին, որ դեմ լինելով իշխանությունների վարած քաղաքականությանը չեն ուզում խոչընդոտել Ցեղասպանության 100-ամյակին նվիրված միջոցառումներին, և բողոքի գործողություններ կսկսեն ապրիլի 24-ից հետո:
Ազատամարտիկների միջև տարաձայնություններն ու մարտավարական տարբերությունները նորություն չեն՝ երբեմն բացահայտ, երբեմն էլ անուղղակի կերպով նրանք միմյանց հասցեին մեղադրանքներ են հնչեցնում:
Ազատամարտիկ Խաչիկ Ավետիսյանի ընտրած պայքարի մեթոդը քննադատվում է անգամ «Հիմնադիր խորհրդարան»-ում, ում անդամների ազատության համար Ավետիսյանը Մարդու իրավունքների պաշտպանի գրասենյակի մոտ հացադուլ և նստացույց է սկսել: Թեպետ այստեղ հարկ է ընդգծել, որ առայժմ անորոշ է՝ Ավետիսյանն ինչ է ընդհանրապես անում՝ մեկ հայտարարում է, թե 50 հոգով հացադուլ են սկսելու, հաջորդ օրը գնում տանը միայնակ հացադուլ անում, օրեր անց վերադառնում ՄԻՊ-ի գրասենյակի մոտ և կոպտում իրենց մոտեցած լրագրողներին:
Ապրիլի 24-ի ՀԽ հանրահավաքի ընթացքում կին ազատամարտիկ Սուսաննա Մուրադյանը մեղադրեց ազատամարտիկներին հանրահավաքին ներկա չգտնվելու և նրանց հետ միասին չպայքարելու համար՝ ընդհուպ ընդգծելով, որ հացադուլ անում է միայն վախկոտը և ոչ ազատամարտիկը:
«Ազատամարտիկների դաշինքի» գործունեությունը դեռևս քննարկումների փուլում է, վերջիններս հատկապես չստացված հեղափոխությունից հետո լուրջ տարաձայնություններ ունեն, ոմանք լքել են դաշինքի շարքերը և պայքարն ինքնուրույն են շարունակում։ Դաշինքի առանցքային դեմքերից Սուրեն Սարգսյան էլ նշում է, որ Դաշինքը լքել է մարտավարական տարաձայնությունների պատճառով։
«Ապարան» ջոկատի հրամանատար Ռազմիկ Պետրոսյանն «Առաջին լրատվական»-ի հետ զրույցում ասաց, որ առայժմ իրենց հետագա անելիքների մասին ծրագիր չունեն, սպասում են Ցեղասպանության 100-ամյակին նվիրված միջոցառումներն ամբողջությամբ ավարտվեն և նոր շարունակեն պայքարը. «Դեռ նոր են ավարտվել ապրիլի 24-ի միջոցառումները, այսինքն՝ չեն էլ ավարտվել, հյուրերի մի մասն այստեղ է: Մենք դեռ քննարկում ենք, հանդիպումներ ենք ունենում, իրավիճակն ենք գնահատում, տեսնենք՝ ոնց կլինի»,- ասաց Պետրոսյանը:
Դիտարկմանը, որ այս օրերին էլ ազատամարտիկներին և մյուս ձերբակալվածներին ազատ արձակելու պահանջով հանրահավաքներ են լինում, և հարցին՝ արդյոք իրենց մասնակցելո՞ւ են, Ռազմիկ Պետրոսյանն ասաց. «Իհարկե, մասնակցություն կլինի: Ընթացքում պարզ կլինի, դեռ նոր միջոցառումներն ավարտվում են, երկրի հյուրերը նոր գնում են: Այն, որ այսպես չի մնալու, միանշանակ է, բայց դեռ հստակ ոչինչ չենք որոշել: Երկրում միջոցառումներ են լինում, այսօր մենք որևէ միջոցառման խանգարելու միտում չունենք, անպայման կտեղեկացնենք մեր հետագա անելիքների մասին»,- ընդգծեց նա:
Մինչև ապրիլի 24-ը զանգվածային բողոքի միջոցառումներ չանցկացնելու որոշում էր կայացրել նաև Հայ ազգային կոնգրեսը: Առաջին նախագահ Լևոն Տեր-Պետրոսյանը հայտարարեց, որ մինչև ապրիլի 24-ը իրենք հանրահավաքներ չեն անելու և դաշտն ազատ են թողնում իրենց գործունեությունը քննադատող մյուս ընդդիմադիրների համար:
Կոնգրեսի վարչության և «Ազատամարտիկների դաշինքի» անդամ Վարդան Մալխասյանը, սակայն, կողմ էր հենց ապրիլի 24-ին հանրահավաք անցկացնելուն: Նրա բնորոշմամբ՝ այս իշխանությունների դեմ պայքարի բոլոր մեթոդներն ու ձևերն արդարացված են. «Ինձ համար կարևոր չէ՝ ազատամարտիկներն ինչ հայացքներ ունեն, ազատամարտիկը մնում է ազատամարտիկ: Ես խստագույնս դատապարտում եմ մեր ընկերների ձերբակալությունը. դա դավաճանություն է հայ ժողովրդի նկատմամբ: Ազգի նվիրյալներին երբ հալածում են, կեղծ հերոսներ ստեղծում՝ այդպես ազգը առաջ չի կարող գնալ»,- ասաց Մալխասյանը։
Հարցին, թե այդ դեպքում ինչո՞ւ չի պայքարում «Հիմնադիր խորհրդարան»-ի հետ միասին, ներկա չի լինում նրանց կազմակերպած հանրահավաքներին, Վարդան Մալխասյանը պատասխանեց. «Ես այս օրերին շատ զբաղված եմ, անձնական խնդիրներ ունեմ, բայց ամեն կերպ և ամեն ինչով իրենց հետ եմ: Ես միշտ էլ կողմնակից եմ եղել ռադիկալ կտրուկ գործողությունների: Մենք գործ ունենք քրեաօլիգարխիկ բանդիտական համակագի հետ, բոլոր պայքարի ձևերն արդարացված են: Ինչքան դանդաղենք, այդքան ավելի վատ»:
