Նեպալում ավերիչ երկրաշարժի զոհերի թիվը, վերջին տվյալներով գերազանցել է 3 700-ը, գրում է spletnik.ru-ն: Հիշեցնենք՝ 7,9 մագնիտուդով երկրաշարժը Նեպալում տեղի է ունեցել ապրիլի 25-ին:
Նեպալի համար այս աղետը սպառնում է հումանիտար ճգնաժամով: Հիվանդանոցներում տեղերի, սննդամթերքի և խմելու ջրի պակաս կա: Բժիշկները վարակիչ հիվանդությունների բռնկման մտավախություն ունեն: Երկրում մի քանի բնակավայր է ավերվել, ներառյալ՝ Կատմանդու պատմական կենտրոնը:
Ամբողջ աշխարհի բնակիչներն անտարբեր չեն մնում ողբերգությանը, նրանց թվում՝ հայտնիներ, որոնք, սոցցանցերում մեծ թվով հետևորդներ ունենալով՝ կարող են օգնել` տուժածներին օգնության կազմակերպմանը:
Այսպես, երգչուհի Էննի Լեննոքսը բրիտանացիներին կոչ է անում 5-ական ֆունտ նվիրաբերել Oxfam բարեգործական կազմակերպությանը, որը հիմա մարդասիրական օգնություն է հասցնում Նեպալ և օգնում աղետից տուժածներին:
Միջոցների հավաքմանը միացել է նաև գրող Ջոան Ռոուլինգը, որը Twitter-ում գրել է.
«Իմ սիրտն այսօր Նեպալում է: 1 ամիս առաջ ես այնտեղ հրաշալի մարդկանց հետ եմ ծանոթացել: Ես գումար եմ նվիրաբերում Oxfam-ի համար, խնդրում եմ, միացեք ինձ»:
Սոցցանցերում իրենց երկրպագուներին են դիմել այլ հայտնիներ ու միջոցների հավաքման կոչ են անում՝ Զոուի Սալդանան, Ռիկի Մարտինը, Փինքը:
Բրայան Ադամսը գրում է. «Շատ տխուր է երկրաշարժի և բոլոր զոհվածների մասին լսելը: Իմ մտքերն այն մարդկանց հետ են, ովքեր հիմա այնտեղ են»:
Քլոե Քարդաշյանը ևս միացել է դրամահավաքի կոչին. «Իմ մտքերն ու աղոթքները Նեպալի հպարտ, քաջ ժողովրդի հետ են: Սա այնպիսի ավերիչ ողբերգություն է»:
Դուեյն Ջոնսոնը գրում է. «Աղոթում եմ Նեպալի ժողովրդի և բոլորի համար, ում հարվածել են ողբերգական իրադարձությունները: Մի դադարեք հավատալ և ուժեղ մնացեք»:
Աջակցության խոսքեր են հրապարակել նաև Էլեն Դեջեներեսը, Մենդի Մուրը, Միսսի Էլիոթը և այլոք:
