«Առաջին լրատվական»-ի զրուցակիցն է ԱԺ ԲՀԿ խմբակցության պատգամավոր Ռուստամ Գասպարյանը:
– Ժիրայր Սեֆիլյանն ու ընկերներն այսօր քաղբանտարկյալ են համարվում, իսկ Ազատամարտիկների դաշինքը մեծ հաշվով չսատարեց նրանց այս ընթացքում: Ինչո՞վ է դա պայմանավորված:
– Իսկ ո՞նց էր սատարելու:
– Նկատի ունեմ՝ նստացույց էին որոշել անել, հետո հրաժարվեցին: Ձեր գնահատականը վերջին օրերին տեղի ունեցածին:
– Առաջին օրից սկսած՝ ես քննադատել եմ այս բռնությունները: Չի կարելի այսօր մարդուն նման ճնշումների ենթարկել իր տեսակետների, կարծիքի համար: Ես քննադատում եմ:
– Ինչո՞վ էր պայմանավորված, արդյոք նրանք կառավարությանը վտա՞նգ էին ներկայացնում:
– Ժիրայրի վերջին արած հայտարարությունը, թե՝ ապրիլի 24-ին պատրաստվում են ինչ-որ գործողություններ անել, ես չընդունեցի, որովհետև դա մեզ համար գիտենք՝ ինչ օր է, ամբողջ աշխարհն էր ոտքի կանգնած այդ օրվա համար: Չընդունեցի Ժիրայրի այդ պահը: Ուրիշ բան էր դրանից առաջ և դրանից հետո: Երևի կոնկրետ օրվա խնդիրն էր ձերբակալությունը, որ աշխարհով մեկ խայտառակ չլինեինք:
– Իսկ արդյոք պայքարելո՞ւ եք նրանց ազատության համար: Ասում էին՝ ապրիլի 24-ից հետո նրանց ազատ կարձակեն:
– Երևի բաց կթողնեն, այլևս պահելն իմաստ չունի:
– Այսուհետ պայքարն ինչպե՞ս եք շարունակելու: Հիմա Ազատամարտիկների դաշինք կա՞, թե՞ չկա:
– Դաշինքը կա, բայց պայքարի մասին դեռ որոշում չունենք:
– Նշանակում է՝ ճանապարհային քարտեզ չունե՞ք, թե երկիրն ինչպես պետք է դուրս բերեք այս իրավիճակից:
– Այսօրվա վիճակով դեռ երևի բոլորն են շոկի մեջ, ու ոչ մեկը դեռ դուրս չի եկել այս շոկից: Ուղղակի դեռ ծրագրեր են մշակվում:
– Նկատի ունեք այն, ինչ տեղի ունեցավ ԲՀԿ-ի և ընդդիմության հե՞տ:
– Ոչ միայն ընդդիմության, ամբողջ ժողովրդի հետ այդ շոկը կատարվեց: Գնալով երկիրը դատարկվում է, տեսնում ենք, թե ինչ վիճակի է հասնում: Բոլորիցս է գնում: