«Առաջին լրատվական»-ի զրուցակիցն է Հիմնադիր խորհրդարանի քարտուղարության ժամանակավոր համակարգող, ԱՍԱԼԱ-ի մարտիկ Ալեք Ենիգոմշյանը:
Նրա կարծիքով՝ այս պահին հիմնավոր պատճառներ չկան՝ կարծելու, թե ապրիլի 24-ից հետո ՀԽ ձերբակալված անձինք ազատ կարձակվեն: Ըստ նրա՝ ՀԽ-ն շարունակելու է պայքարը թե ձերբակալվածների ազատ արձակման և թե վարչախմբին հեռացնելու ու նոր Հայաստան կառուցելու ուղղությամբ: Ըստ նրա՝ քաղաքացիական պայքարում զանգվածային անկարգություններ չեն եղել, չեն լինելու: Նրանք շարժվում են նույն վճռականությամբ և համոզված են, որ հաջողելու են, հաղթելու են:
– Ապրիլի 24-ից հետո ձերբակալված ՀԽ անդամների գործում որևէ նորություն կա՞, կամ ակնկալո՞ւմ եք, որ կլինի:
– Այս պահի դրությամբ փոփոխություն սպասելու, ակնկալելու ոչ մի հիմնավոր պատճառ չկա: Ձերբակալություններից անմիջապես հետո և հաջորդող օրերին տարածվում էին լուրեր, որ ապրիլի 24-ից հետո մեր ընկերները ազատ կարձակվեն, սակայն անցյալում քաղաքական դրդապատճառներով քաղաքական հալածանքների ենթարկված, ձերբակալված անձանց պարագայում՝ Վոլոդյա Ավետիսյանի, ինչ-որ չափով՝ Շանթ Հարությունյանի և ընկերների պարագայում ևս նախնական կալանքի ժամանակ միտումնավոր լուրեր էին տարածում, որ ազատ կարձակեն, բայց այդպես չեղավ:
Այդպիսի լուրերի նպատակը կալանավորվածների ընկերների, հարազատների ու աջակիցների շրջանում հանգստություն ստեղծելն է, որպեսզի անընդհատ չպահանջեն նրանց ազատ արձակումը: Նույն տրամաբանությունը այսօր առկա է, համենայնդեպս՝ ես և մենք՝ բոլորս, կուզենայինք, որ մեր այս գնահատականի առումով սխալված լինեինք, և մեր ընկերները ազատ արձակվեին:
Ապրիլի 24, 25-ը և հաջորդող օրերը, եթե, իհարկե, ապացուցելու լրացուցիչ կարիք կար, ամբողջությամբ ապացուցեցին, որ մեղադրանքները, որոնցով մեր ընկերները ձերբակալվել են, ամբողջությամբ շինծու էին, անհիմն հենց առաջին օրվանից, քանի որ բերված ապացույցները ամեն ինչ էին՝ բացի ապացույց լինելուց, դրանք ապացույց չէին: Այս օրերը ապացուցեին, որ զանգվածային անկարգությունների նախապատրաստում բացարձակապես չի եղել և չկա: Հիմա մնում է, որ մենք սպասենք և տեսնենք՝ առաջիկա օրերին վարչախմբի կողմից քայլեր կլինե՞ն, թե՞ ոչ:
Մենք պահանջելու ենք և պայքարելու ենք մեր ընկերների ազատ արձակման համար: Դա եղել է և մինչև 24-ը, և հիմա, և առաջիկայում էլ կշարունակենք:
Եվ եթե մենք ամսի 22-24-ի երեկոն մեր ազատ որոշումով լուռ էինք և աղմուկ չէինք բարձրացնում ՝ հարգելով օրվա խորհուրդը, ապա 24-ից հետո, բնականաբար, խաղաղ քաղաքացիական անհնազանդության, քաղաքացիական պայքարը շարունակելու ենք և պայքարելու ենք տղաների ազատության համար:
Մնում է, որ վարչախումբը իր որոշումը կայացնի և ապացուցի, թե որն է իր իրական նպատակը:
Ինչ վերաբերում է մեր ընկերների կարգավիճակին, ապա մոտավորապես 3 շաբաթ այցելությունները արգելված էին: Անցյալ շաբաթվա վերջում Քննչական կոմիտեից եղել է որոշում, որով արտոնում են հարազատներին այցելել տղաներին: Այսօրվանից արդեն սկսել են այցելել: Միակ փոփոխությունը սա է, որը առաջին օրվանից պիտի լիներ, քանի որ անհեթեթություն կլինի ասել, որ նրանք որևիցե վտանգ էին ներկայացնում և պետք էր արգելել այցելությունները:
Կարևոր և մտահոգիչ է Գևորգ Սաֆարյանի հացադուլը, նա դեռ հացադուլի մեջ է: Այս ուղղությամբ ևս պայքարելու ենք, որպեսզի չեզոքացնենք այն երևույթները, որի համար նա հացադուլի մեջ է:
Հարցազրույցն ամբողջությամբ՝ տեսանյութում։