Իսրայելի նախագահ Ռեուվեն Ռիվլինը կիրակի օրն իր նստավայրում ընդունել է հայ համայնքի ներկայացուցիչներին և լսել նրանց կշտամբանքներն այն պատճառով, որ հրեական պետությունը չի ցանկանում ճանաչել Հայոց ցեղասպանությունը: Այս մասին գրում է RIA Novosti-ն:
Ինչպես հաղորդել է նախագահի մամլո ծառայությունը՝ Ռիվլինն օգտագործել է «հայերի զանգվածային սպանություն» կամ «հայոց ողբերգություն» արտահայտությունները և ասել, որ Իսրայելի իշխանությունները չեն ձգտում կատարվածի մեղքը բարդել «որևէ կոնկրետ երկրի վրա»:
«Հոլոքոստի սարսափներից հետո հայ ժողովրդի ողբերգությունը հարգելը մեր հրեական պարտականությունն է՝ մարդկային և բարոյական: Ես հպարտ եմ ընդունելու ձեզ այստեղ՝ նախագահի նստավայրում, այդ օրը ձեզ հետ նշելու համար»,- ասել է Ռիվլինը հայ համայնքի ներկայացուցիչներին:
Երուսաղեմում հայոց պատրիարքարանի ներկայացուցիչ՝ հանդիպման մասնակից արքեպիսկոպոս Արիս Շիրվանյանը իր «հիասթափությունն է հայտնել այն կապակցությամբ, որ Իսրայելի նախագահը «հայերի սպանությունը չի անվանում ցեղասպանություն»: