ԱՄՆ Կոնգրեսի մի շարք անդամներ ապրիլի 22-ին միացել են Կապիտոլիումի բարձունքում հավաքված շատ ամերիկահայերի՝ ոգեկոչելու Հայոց ցեղասպանության 100-ամյա տարելիցը և հարգանքի տուրք մատուցելու մեկ դար առաջ տեղի ունեցած եղեռնագործության զոհերի հիշատակին: Այս մասին գրում է panorama.am–ը։
Երեկոյի ընթացքում ելույթ ունեցողները կոչերով դիմել են Նախագահ Բարաք Օբամային՝ ճանաչել Հայոց ցեղասպանությունը և վերջ դնել Թուրքիայի կողմից պարտադրվող ժխտողականության քաղաքականությանը:
Հայկական հարցերի կոնգրեսական խմբի ներկայացուցիչներից բացի միջոցառմանը մասնակցել են Հայաստանի Հանրապետության դեսպան Տիգրան Սարգսյանը, ԼՂՀ Մշտական ներկայացուցիչ Ռոբերտ Ավետիսյանը, ամերիկահայ կազմակերպությունների ներկայացուցիչներ:
Դեսպան Սարգսյանն իր խոսքում մասնավորապես ասել է. «Հարյուր տարի է անցել ցեղասպանությունից ի վեր: Մեկ ամբողջ դար, մեկ ամբողջ դարաշրջան: Պոեզիան իր մեջ ներառում է այդ դարաշրջանի ոգին… Պոետը իր ազգի պատիվն է և խիղճը…
Այսօր ես կցանկանայի վերհիշել հայ պոետների և գրողների.
Հրանտ (Մելքոն Գյուրջյան) և Հովհաննես Հարությունյան, Գիրգոր Զոհրապ և Երուխան, Արտաշես Հարությունյան և Ռուբեն Զարդարյան, Սիամանթո, Դանիել Վարուժան, Ռուբեն Սևակ…
Ի՞նչ ընդհանրություն ունեն այս պոետները: Նրանց մահվան օրը: Նրանք բոլորը սպանվեցին 1915-ին:
Կարո՞ղ եք պատկերացնել: Սպանել մի ամբողջ ազգի բոլոր գրողներին միաժամանակ: Հայի պատվի և խղճի ներկայացուցիչներին: Արդյո՞ք սա երբևէ հնարավոր է մոռացության մատնել:
Մեր մեկդարյա պայքարը Հայոց ցեղասպանության ճանաչման համար չունի քաղաքական նպատակներ: Սա պրագմատիկ պայքար չէ, այն քաղաքական շահեր չի հետապնդում: Մենք պայքարում ենք պատմական արդարության վերականգնման համար, մեր պատվի և խղճի համար, մեր ինքնության համար: Այն մեր պոետների հոգիների կանչն է, որը ամեն մի հայ ամբողջ աշխարհում ներառում է իր մեջ:
«Ավելին, քան որևէ այլ բան, հայերը կիսում են արդարության զգացումը: Մեր պայքարը անսասան է: Մեր վճռականությունը անկոտրում է»:
Շնորհակալություն հայտնելով այն երկրներին, որոնք տարբեր մակարդակներում ճանաչել եւ դատապարտել են Հայոց ցեղասպանությունը՝ դեսպան Սարգսյանը նաեւ գոհունակություն է հայտնել ԱՄՆ 43 նահանգներում օրենսդրական եւ գործադիր մարմինների տարբեր որոշումներով Մեծ Եղեռնը ճանաչելու առնչությամբ:
Մանրամասները՝ սկզբնաղբյուր կայքում։