Վերաքննիչ քրեական դատարանում ավարտվել է Գրետա Գ.-ի (անունը փոխված է) գործով բերված վերաքննիչ բողոքի քննությունը:
Գործը քննվել է Գեղարքունիքի մարզի ընդհանուր իրավասության դատարանում Յուրիկ Իսկոյանի նախագահությամբ:
21-ամյա Գրետայի ամուսնուն՝ Վլադիմիրին, 2014 թվականի հուլիսի 31-ի կեսգիշերին ծեծել էր վերջինիս ծանոթ Վոլոդյան:
Ծեծողից վրեժխնդիր լինելու նպատակով, գիտակցելով, որ իր հաղորդած տեղեկությունը կեղծ է, Գրետան նույն օրը ոստիկանությունում գրավոր հաղորդում է տվել, թե Վոլոդյան, բռնություն գործադրելով իր նկատմամբ, կեսգիշերին իրենց տան բակից իրեն քաշելով տարել է փողոց, հրել, գցել է գետնին ու փորձել է իր կամքին հակառակ սեռական հարաբերություն ունենալ իր հետ:
Արդյունքում, սակայն, պատասխանատվության ենթարկվելու փաստի առաջ կանգնել է ոչ թե «բռնարար Վալոդը», այլ «զոհը»՝ հենց հաղորդում տվող Գրետան:
Գրետա Գ.-ին մեղադրանք է առաջադրվել սուտ մատնության համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:
Ըստ դատական ակտի՝ Վոլոդյան 2013 թվականից ճանաչել է Գրետայի ամուսին Վլադիմիրին ու վերջինիս մորաքրոջը, ով Վլադիմիրի համար, նրա ծնողների մահից հետո, ծնողի նման է եղել:
Վոլոդյան Վլադիմիրի մորաքրոջը ճանաչել է «Սուր անկյուն» հաղորդումից հետո, նրա ու Վլադիմիրի հետ եղել է լավ հարաբերությունների մեջ, հաճախ այցելել է նրանց տուն:
2014 թվականի հուլիսի 30-ին Վոլոդյան համագյուղացի Մարզպետի հետ գնացել է գնումներ կատարելու: Գնումներից հետո որոշել են այցելել Վլադիմիրի մորաքրոջը:
Վլադիմիրն ընդունել է հյուրերին: Նրա մորաքույրն իր չորս երեխաների հետ տանը չի եղել: Վլադիմիրը հյուրասիրել է հյուրերին:
Վերջիններս Վլադիմիրի կողքին տեսել են Գրետային, ում ճանաչում էին, երբ նա աշխատում էր Մարտունիում: Վլադիմիրը հյուրերին ասել է, թե ինքը Գրետայի հետ ամուսնացել է:
Վոլոդյան նկատել է, որ իրենց ներկայությունը Վլադիմիրին ու Գրետային հաճելի չէ:
Հյուրերը «բարի գիշեր» են ասել ու դուրս են եկել:
Վոլոդյան ընկերոջն ասել է, որ մեքենայում սպասի, մինչև ինքը բնական կարիքները հոգա: Երբ Վոլոդյան անցել է Վլադիմիրի բնակարանի մոտով, լսել է, որ Վլադիմիրը Գրետայի հետ խոսելով՝ իր ու ընկերոջ հասցեին հայհոյանքներ է տալիս:
Վոլոդյան այդ հանգամանքից վիրավորվել, ներս է մտել ու Վլադիմիրին դուրս է հրավիրել:
«Վալոդն» ու Վլադիմիրը վիճել են հայհոյանքների վերաբերյալ: «Վալոդը» հարվածներ է հասցրել Վլադիմիրին, նրա ձախ ազդրի շրջանում քերծվածքներ է առաջացրել:
Վլադիմիրն էլ բռունցքներով խփել է Վոլոդյայի մարմնին, պարանոցի ու գոտկատեղի շրջանների քերծվածքներ է պատճառել:
Գրետան միջամտել է, ցանկացել է կռիվը դադարեցնել: «Վալոդը» հրել է Գրետային՝ ասելով, որ չխառնվի տղամարդկանց խոսակցությանը:
Գրետան շարունակել է «խանգարել» կռվողներին: «Վալոդը» բռնել է նրա շորից՝ տաբատի գոտկատեղից, քաշել է մի կողմ, որի ընթացքում, ըստ դատական ակտի, «պոկվել է տաբատի շղթան»:
Գրետան չի հեռացել: «Վալոդը» նորից հրել է նրան, ու Գրետան վայր է ընկել:
Վլադիմիրն այդ ընթացքում գնացել է տուն՝ կոշիկները հագնելու, իսկ «Վալոդն» ու Գրետան շարունակել են խոսակցությունը: «Վալոդը» Գրետային ասել է. «Խելոք մնա, թե չէ կտանեմ քո հայրական տուն»:
Գրետան ու «Վալոդը» նույնիսկ քաշքշել են իրար, մինչև որ արդեն կոշիկները հագած Վլադիմիրն օգնության է հասել կնոջը: Քաշքշոցը մի քիչ էլ շարունակվել ու դադարել է:
Հյուրերը հեռացել են, Վլադիմիրն ու Գրետան տուն են մտել:
Գրետան զանգել է ոստիկանություն, հաղորդում է տվել, թե Վոլոդյան ծեծել է իր ամուսնուն, հետո էլ իրեն քարշ է տվել փողոց ու փորձել է հենց փողոցում բռնաբարել:
Բռնաբարության փորձի համար քրեական գործ է հարուցվել, բայց նախաքննության ընթացքում հիմնավորվել է, որ նման փորձ չի կատարվել:
Ընդհանուր իրավասության դատարանում Գրետան իրեն մեղավոր է ճանաչել: Հայտնել է, թե Վլադիմիրի հետ փաստական ամուսնական հարաբերությունների մեջ է: Դեպքի օրը հյուրերի գնալուց հետո ամուսնուն ասել է, որ նրանց հետ չի ցանկանում այլևս ոչ մի տեսակ շփում ունենալ: Հնարավոր է՝ ամուսինն էլ հայհոյանքներ հնչեցրած լինի հյուրերի հասցեին, քանի որ նրանց ներկայությունն իրենց համար ցանկալի չի եղել:
Դրանից հետո իրենք պառկել են քնելու, երբ Վոլոդյան հետ է եկել ու ամուսնուն դուրս է կանչել:
Որոշ ժամանակ հետո ինքը դուրս է եկել, տեսել է՝ նրանք իրար հարվածներ են հասցնում: Փորձել է միջամտել, Վոլոդյան քաշքշել է իրեն, այդ ժամանակ իր տաբատի շղթան պոկվել է:
Ինքը Վոլոդյայից վրեժխնդիր լինելու համար է սուտ հաղորդում տվել, թե նա փորձել է իրեն բռնաբարել:
Ամբաստանյալը զղջացել է, ասել է, թե սուտ մատնությունը կատարել է իր նախաձեռնությամբ, ոչ ոք դրա հետ կապ չունի:
Վոլոդյան հայտնել է, թե Գրետային հրել է, որովհետև նա անընդհատ միջամտել է վեճին, սակայն Գրետան «պոկ չի եկել ու ամբողջ ընթացքում անկանոն շարժումներ է արել»: Երևի այդ հրմշտոցի ժամանակ է պոկվել նրա տաբատի շղթան, ինքը դա չի նկատել:
Հետո զգացել է, որ եթե չհեռանա, ամեն բան ավելի կթեժանա, նստել է մեքենա ու ընկերոջ հետ հեռացել է: Հաջորդ օրն իրեն հրավիրել են ոստիկանություն, որտեղ իմացել է, որ Գրետան հաղորդում է տվել՝ իբր ինքը փորձել է նրան բռնաբարել: Նման բան ինքը չի արել:
Ընդհանուր իրավասության դատարանը Գրետային մեղավոր է ճանաչել ՀՀ քրեական օրենսգրքի 333 հոդվածի 2-րդ մասի 1-ին կետով, դատապարտել է 1 տարի ազատազրկման, ապա պայմանական դատապարտություն է կիրառել նրա նկատմամբ ու սահմանել է 1 տարի փորձաշրջան:
Դատավճիռը բողոքարկել էր մեղադրողը:
Նրա կարծիքով՝ ամբաստանյալի նկատմամբ պատիժը պայմանականորեն չկիրառելով՝ դատարանը խախտել է օրենքի պահանջները, հաշվի չի առել արարքի հանրային վտանգավորության աստիճանը, հատկապես՝ ամբաստանյալին բնութագրող տվյալները, այն, որ Գրետան նախկինում էլ է կատարել համասեռ հանցավոր արարք՝ իր հորեղբորն է սուտ մեղադրել՝ իր կամքին հակառակ իր հետ բռնի սեռական հարաբերություն ունենալու համար: Այդ սուտ մատնության փաստով հարուցված քրեական գործի վարույթը կարճվել է, բայց, ըստ մեղադրողի, Գրետան անհրաժեշտ հետևությունների չի հանգել: Նա չի ուղղվել: Վրեժխնդիր լինելու ցանկությունը բավարարում է մարդկանց սեռական ոտնձգություն կատարելու համար սուտ մեղադրելով:
Մեղադրողը միջնորդել է Գրետային դատապարտել իրական ազատազրկման՝ առանց պայմանական դատապարտության կիրառման:
Վերաքննիչ քրեական դատարանը եզրակացրել է, որ Գրետայի նկատմամբ պայմանական դատապարտության կիրառման պարագայում հնարավոր է հասնել պատժի նպատակներին՝ արդարության վերականգնմանը, պատժի ենթարկված անձի ուղղմանը, հանցագործությունների կանխմանը:
Ըստ վերաքննիչ ատյանի՝ մեղադրողի բողոքում բերված փաստարկները բավարար չեն ամբաստանյալի նկատմամբ պայմանական դատապարտության կիրառումը վերացնելու համար:
Բացի այդ, պայմանական դատապարտության ենթարկված ամբաստանյալը չի ազատվել քրեական պատասխանատվությունից, նրա նկատմամբ սահմանվել է փորձաշրջան, որի ընթացքում չուղղվելու, նորից հանցանք գործելու դեպքում ազատազրկման ձևով նշանակված պատիժը ստիպված կլինի կրել:
Վերաքննիչ քրեական դատարանը մերժել է մեղադրողի վերաքննիչ բողոքը և անփոփոխ է թողել ընդհանուր իրավասության դատարանի դատավճիռը: