«Առաջին օրվանից ես դեմ եմ եղել հայ-թուրքական արձանագրություններին: Այդ արձանագրությունները Հայաստանի ու ընդհանրապես հայության շահերին վնասակար փաստաթղթեր են: Վաղուց էր պետք դրանք ետ կանչել, և պետք էր ետ կանչել նաև ստորագրությունները՝ անկախ այն հանգամանքից, թե թուրքերն ինչ են անում»,- «Առաջին լրատվական»-ի հետ զրույցում ասաց «Կալիֆոռնիա Կուրիեր» թերթի հրատարակիչ Հարութ Սասունյանը՝ անդրադառնալով Սերժ Սարգսյանի այն հայտարարությանը, թե եթե Թուրքիան վավերացնի հայ-թուրքական արձանագրությունները, Հայաստանը նույնպես դրանք կվավերացնի:
Հիշեցնենք, որ Ս. Սարգսյանը հայ-թուրքական արձանագրությունները ետ է կանչել Ազգային ժողովից, բայց ստորագրությունները ետ չի կանչել: Հ. Սասունյանի խոսքով՝ Հայաստանի իշխանություններն այդ փաստաթղթերից ստորագրությունը ետ չեն կանչում այն պատճառով, որ չեն ցանկանում վատամարդ լինել: «Հավանաբար թողնում են, որ նախ թուրքերն իրենք ետ վերցնեն ստորագրությունները»,- կարծում է Հ. Սասունյանը:
Վերջինս մեզ հետ զրույցում անդրադարձավ նաև Ռուսաստանի արտգործնախարար Սերգեյ Լավրովի այն հայտարարությանը, թե «Մոսկվան կարող է նպաստել, որպեսզի Թուրքիայի և Հայաստանի միջև համագործակցության զարգացման մասին փաստաթղթերն ուժի մեջ մտնեն»:
«Եթե որևէ երկիր ուզում է ոչ թե աջակցել հայ-թուրքական հարաբերություններին, այլ ընդհանրապես աջակցել, որ հայկական շահերը պաշտպանվեն ու զարգանան, ես դեմ չեմ, որ որևէ մեկը իր բարի կամքով միջնորդ լինի և օգնի, որ մեր շահերն առաջ մղվեն: Իսկ եթե նրանց նպատակներն այն են, որ արձանագրությունները վավերացվեն և հայ-թուրքական հարաբերությունները բարելավվեն, ես կտրականապես դեմ եմ նման աշխատանքին: Ես դեմ եմ, որ առանց Ցեղասպանության ճանաչման ու հատուցման մենք որևէ կերպ բնականոն հարաբերություններ ունենանք Թուրքիայի հետ: Թուրքիան ցեղասպան երկրի հաջորդ կառավարությունն է, չի ընդունում իր մեղքը և դեռ սպառնում է հայերին ամեն օր՝ Ադրբեջանին զենք տալով: Այս հարցը միայն անցյալի պատմությանը չի պատկանում, պատկանում է այսօրվա մեր գոյությանը»,- եզրափակեց Հ. Սասունյանը: