Հանրահայտ հեռուստաաստղ Քիմ Քարդաշյանն ամերիկյան հեղինակավոր Time ամսագրի իր հոդվածում անդրադարձել է Հայոց ցեղասպանությանը:
«Երբ մենք մեծացանք, մեր հայրը պատմում էր մեզ մեր ժառանգության մասին։ Մենք ուտում էինք հայկական ուտեստներ, լսում պատմություններ, մեր հայրիկն իսկապես շատ էր մեզ պատմում հայերի մասին պատմություններ։ Մեզ ասում էր, որ շատ հայեր տեղափոխվել են, նրանք փոխել են իրենց ազգանվան «յան» վերջավորությունը՝ վախենալով սպանվել։
Ինչ էլ որ անեք, աղջիկնե´ր, երբեք չփոխեք ձեր ազգանունը՝ այն Քարդաշյան է՝ասում էր հայրս։ Նա շատ էր բարձրաձայնում և ցանկանում էր, որ մենք էլ երբեք չմոռանանք՝ որտեղից ենք մենք»,- գրել է Քարդաշյանը։
Ամերիկահայ աստղը նշում է, որ իր նախնիները Լոս Անջելես են տեղափոխվել 1914-ին՝ մինչև Ցեղասպանությունը։
«Այնքան շատ մարդիկ կան, ովքեր կորցրել են իրենց ընտանիքները, և պատմությունները, թե ինչպես են նրանք սպանվել, այնքան հուզիչ են։ Նրանք երբեք չպետք է մոռացվեն»,- նշել է Քարդաշյանը։
Նրա խոսքով՝ Ցեղասպանությունը հիշելու նպատակն այն է, որ այն այլևս երբեք չկրկնվի։ 1.5 մլն մարդ սպանվել է, և ԱՄՆ-ը կարող է ձևացնել, որ դա երբեք չի կատարվել։ Չեմ կարծում, որ դա ճիշտ է՝ ասել է Քարդաշյանը։
«Իմ ընտանիքը երկար ժամանակ ցանկանում էր գնալ Հայաստան։ Իմ հայրիկը նույնպես կցանկանար գնալ։ Իմ տատիկն ու պապիկը՝ նույնպես։ Իմ նախնիները կցանկանային գնալ, սակայն նրանցից ոչ մեկին դա չհաջողվեց»,- գրել է հայազգի աստղը։
«Իմ քույր Քլոեն, դուստրս՝ Նորթը, և ամուսինս՝ Քանյե Ուեսթը, այս ամիս վերջապես մեկնեցինք Հայաստան։ (ԱՄՆ-ում) այնքան շատ մարդ է մոտեցել ինձ ու ասել, որ չեն իմացել Ցեղասպանության մասին։ Եթե մենք կարող ենք ուշադրություն գրավել, ինչո՞ւ անգործ նստենք»,- գրել է Քարդաշյանը։
Այժմ ժամանակն է խոսել այդ մասին, և յուրաքանչյուրը կարող է օգնել։ Քիմը նշել է, որ շարունակելու է այդ հարցը բարձրացնել և պայքարել Ցեղասպանության ճանաչման համար։
«Ես շատ կցանկանամ, որ նախագահ Օբաման օգտագործի «ցեղասպանություն» բառը։ Շատ հիասթափեցնող է, որ նա՝ որպես նախագահ, չի օգտագործում այդ բառը։ Մենք կարծում էինք, որ դա տեղի կունենա այս տարի։ Կարծում եմ՝ մենք շատ մոտ ենք, մենք իսկապես շարժվում ենք ճիշտ ուղղությամբ»,- ասել է նա։
Հեռուստաաստղի կարծիքով՝ ժամանակն է, որ Թուրքիան ճանաչի Ցեղասպանությունը։ Դա հիմա այնտեղ ապրող մարդկանց մեղքը չէ, դա տեղի է ունեցել 100 տարի առաջ։ Եթե նրանք ճանաչեն և ընդունեն դա, կկարողանան առաջ շարժվել։ Քիմը նշել է, որ հավատում է առաջընթացին և լուսավոր ապագային, սակայն հնարավոր չէ առաջ գնալ՝ չընդունելով անցյալը։
«Հայաստանի վարչապետ Հովիկ Աբրահամյանն ինձ տվել է Ցեղասպանության 100-ամյակի խորհրդանիշ անմոռուկ կրծքանշանը։ Մանուշակագույնն իմ դստեր սիրելի գույնն է, այդ պատճառով էլ նա ցանկանում է կրել այդ կրծքանշանն ամեն օր։ Երբ նա մեծանա, ես նրան կպատմեմ այդ զարդի իրական նշանակության մասին։ Ես կիսով չափ հայ եմ, սակայն մեծացել եմ հայ ինքնության շատ մեծ զգացողությամբ և ցանկանում եմ, որ իմ դուստրը նույնպես ունենա այդ զգացողությունը»,- հավելել է Քիմը։