Անկարան դատապարտում է Ֆրանսիայի նախագահ Ֆրանսուա Օլանդին 1915թ. Օսմանյան կայսրությունում հայերի ցեղասպանության վերաբերյալ արտահայտությունների համար, ասվում է Թուրքիայի ԱԳՆ-ի տարածած հայտարարության մեջ: Այս մասին տեղեկացնում է RIA Novosti-ն:
Երեկ Ֆրանսիայի նախագահը Երևանում Հայոց ցեղասպանության հիշատակի արարողությունների ժամանակ հայտարարել էր, թե երբեք չի մոռանա տեղի ունեցած ողբերգությունները:
«Կարելի էր սպասել Օլանդից, որ արարողության ժամանակ նա կխոստովանի, թե Օսմանյան կայսրության բոլոր քաղաքացիները՝ անկախ կրոնից ու ազգությունից, ողբերգություն են ապրել դրա փլուզման գործընթացում: Ցավոք, նա նախընտրեց շարունակել իր խտրական մոտեցումը:
Թուրքիան կտրականապես հերքում ու դատապարտում է Ֆրանսիայի անարդար ու կանխակալ վերաբերմունքը: Նման մոտեցումը չի կարելի դիտարկել որպես դրական Ֆրանսիայում ապրող 600 հազար թուրքերի նկատմամբ»,- ասվում է Թուրքիայի ԱԳՆ հայտարարության մեջ: