Կրթության եւ գիտության նախարարությունը ոչ պետական բուհերին հավատարմագրեր տրամադրելու առնչությամբ թերանում է եւ բազմաթիվ բացթողումներ ունի: Այս տարի Վերահսկիչ պալատի իրականացրած ուսումնասիրություններից պարզվել է, որ Մասնագիտական կրթության որակի ապահովման ազգային կենտրոն հիմնադրամի 2010-2015թթ. ռազմավարական ծրագիրը հաստատված չէ հոգաբարձուների խորհրդի կողմից, հաստատված չեն կրթության որակի ապահովման չափանիշներն ու չափորոշիչները, ինչպես նաեւ ԿԳՆ լիցենզավորման վարչության կողմից հաշվարկված չեն ոչ պետական բուհերի տարածքների հաշվարկման նվազագույն նորմատիվները: Այս ամենը փաստում է այն մասին, որ հայաստանյան ոչ պետական ուսումնական հաստատություններում համատարմագրման գործընթաց չի իրականացվել:
Բնական է, որ նման պայմաններում սնկի նման կաճեն ոչ պետական բուհերը: Ավելին, Վերահսկիչ պալատը նաեւ բացահատել է ամբողջությամբ առանց լիցենզիայի գործող համալսարան: «Նիկոլ Գալանտերյանի անվան բեմարվեստի մանկավարժական համալսարանը» գործունեության լիցենզիա չունի, սակայն ակտիվ գործունեություն է ծավալում, ինչպես նաեւ լրատվամիջոցներով հայտարարություններ է տալիս:
«Փաստորեն, ինչ-որ մի անձնավորություն կարող է վեր կենալ եւ լրատվամիջոցներով հայտարարել, թե բեմարվեստ է ուսուցանում, բայց լիցենզիա չունի, սակայն ԿԳՆ-ն ոչ մի բան չի կարող իրականացնել, քանի որ այդ համալսարանը իր լիազորություններից դուրս է»:
Նշենք, որ Քրեական օրենսգրքի 118-րդ հոդվածի համաձայն` դա համարվում է ապօրինի ձեռնարկատիրություն` քրեորեն հետապնդելի արարք, եւ կարող է պատժվել օրենքի ամբողջ խստությամբ:
Իշխան Զաքարյանը խուսափեց այդ բացթողման համար ԿԳՆ-ին մեղադրելուց եւ նշեց, որ ավելի շուտ թերացել են իրավապահ մարմինները եւ պետեկամուտների վարչությունը, քանի որ չլիցենզավորված ձեռնարկությունը հարկային գործունեություն է ծավալել: