ԱՄՆ-ի խանութներում պաշտոնապես հայտնվել են Apple թվային ժամացույցները: Ընկերությունը նորովի է մոտեցել իր արտադրանքի վաճառքին՝ առաջին խմբաքանակը նախնական վաճառքներով կազմակերպելով: Այսպիսով, վերջին շրջանում առաջին անգամ, Apple-ի հերթական արտադրանքը վաճառքի է դուրս եկել առանց հերթերի գոյացման, գրում է RIA Novosti-ն:
Թվային նոր ժամացույցների գիծը Apple-ը ներկայացրել է մարտի 10-ին: Չնայած խելացի ժամացույցի վաճառքի մեկնարկը նշանակվել էր ապրիլի 24-ին՝ այն այդ օրը գնել հնարավոր չէր: Երկու շաբաթ առաջ ընկերությունը սկսել է նախնական պատվերներ ընդունել: Նրանց, ովքեր հասցրել էին պատվեր ձևակերպել, ժամացույցը տուն է մատակարարվել: ԱՄՆ-ի որոշ քաղաքներում պատվերը հնարավոր է վերցնել նաև ընկերության խանութներից:
Նախնական պատվերների համակարգը չի երաշխավորել, որ գաջեթը բաժին կհասնի բոլոր ցանկացողներին: Apple-ի ղեկավարությունը որոշել է վերջ դնել խանութների մոտ անվերջանալի հերթերին, որոնք բնորոշ են ընկերության նոր արտադրանքը շուկայում հայտնվելու օրվան: Սակայն, այնպես է ստացվել, որ ավանդական «կենդանի» հերթերը փոխարինվել են էլեկտրոնային ցուցակներով:
ԱՄՆ-ում գրեթե մեկ միլիոն ժամացույցի նախնական պատվերներ են ընդունվել:
Գաջեթի վաճառքը սկսվել է ԱՄՆ-ում, Կանադայում, Ավստրալիայում, Չինաստանում, Ֆրանսիայում, Գերմանիայում, Ճապոնիայում, Անգլիայում և Հոնկոնգում: