«Ես այն կարծիքին եմ, որ այն գործընթացները, որոնք տեղի են ունենում այսօր քաղաքական առումով պետք է ճիշտ օգտոգործել: Սփյուռքը պետք է պահանջի հատուցում, ազգայնական կուսակցություններն իշխանություններից պետք է պահանջեն ավելի լուրջ ներդրումներ, ավելի մեծ ջանքեր: Իսկ այս ենթատեքստում ինձ չի բավարարում իշխանությունների պահվածքը»,- այսօր Ցեղասպանության զոհերի հուշահամալիր այցելության ժամանակ «Առաջին լրատվական»-ի հետ զրույցում ասաց «Հանրապետություն» կուսակցության նախագահ Արամ Սարգսյանը: Նրա խոսքով՝ իշխանությունն այս օրերին պետք է դերերի տարանջատում իրականացնի, թե ինչ պետք է այսուհետ անի Սփյուռքը, ինչ՝ տեսական ազգայնական կուսակցությունները, ինչ պետք է անեն լիբերալները: «Բայց երբ իշխանությունն իր վրա ստանձնում է դաշնակցության ֆունկցիան, դա նորմալ չէ: Դա արդեն չի խոսում պետության եւ պետականության մասին: Իշխանության ֆունկցիան պետք է լինի ավելի հավասարաչափ ու ավելի տրամաբանված գործողությունները»,- հավելեց պարոն Սարգսյանը:
Վերջինս մեզ հետ զրույցում նշեց, որ Հայաստանյան իշխանությունները պետք է վավերացնեին Ցյուրիխյան արձանագրությունները: Սարգսյանի խոսքով՝ վաղ թե ուշ Թուրքիայի հետ դիվանագիտական, քաղաքական հարաբերություններ ստեղծվելու են, ընդ որում առանց երրորդ կողմի միջնորդության: «Եվ ինչքան շուտ, այնքան լավ, քանի որ ցանկացած երրորդ կողմի միջնորդությունը շահ է ենթադրում»,- նկատեց Սարգսյանը:
Արամ Սարգսյանն անդրադառնալով ԱՄՆ-ի գործողություններին, նկատեց, որ այն օրը, երբ ԱՄՆ-ը ճանաչի Հայոց ցեղասպանությունը, հաջորդ օրը Թուրքիան ևս կճանաչի: «Եվ ԱՄՆ-ը և ԱՄՆ-ի քաղաքական էլիտան հիմա ամեն ինչ անում է, որ Թուրքիան ճանաչի Ցեղասպանությունը: Եվ հենց որ Թուրքիան համաձայնությունը տա, ապա առաջինն ԱՄՆ-ը կասի, որ ճանաչում է, բայց դա որոշակի գործընթաց է պահանջում: Ամեն դեպքում ես կարծում եմ, որ Օբաման պետք է օգտագործեր 100-ամյակի պահը և օգտագործեր Ցեղասպանություն բառը, այլ ոչ թե բառախաղով զբաղվեր »,- ասաց Սարգսյանը:
Առավել մանրամասն՝ տեսանյութում