«Բարաք Օբաման պարզապես իր սուտը պնդեց: Որպես նախագահի թեկնածու՝ նա խոստացել էր, որ պետք է ընդունի Հայոց ցեղասպանությունը, բայց մյուս նախագահների նման նա նույնպես խաբեց»,- «Առաջին լրատվական»-ի հետ զրույցում ասաց ԱՄՆ Կալիֆոռնիայի հայ փաստաբանների միության անդամ Կարո Քամարյանը:
Նրա խոսքերով՝ այսօր Ամերիկայի շահերն ավելի շատ են համընկնում Թուրքիայի շահերի հետ, այդ պատճառով ԱՄՆ-ը իր հայ քաղաքացիներին նեղացնում է: «Այս նախագահն նախորդների նման ընտրեց իր քաղաքացիներին նեղացնելու և ցեղասպան Թուրքիայի հետ հլու-հնազանդ բարեկամ մնալու ճանապարհը»,- ասում է իրավաբանը:
Արդյոք 100-րդ տարելիցի կապակցությամբ ամերիկահայերը հո՞ւյս ունեին, որ ԱՄՆ նախագահ Բարաք Օբաման պաշտոնապես կճանաչի Հայոց ցեղասպանությունը: «Ամերիկահայությունը միամիտ չէ, մենք տարիներ շարունակ անցել ենք քարքարոտ ճանապարհներով: Բայց դա չի նշանակում, որ ԱՄՆ կառավարությունը երբեք չի ընդունել Ցեղասպանությունը: ԱՄՆ 50 նահանգից 43-ն այդ իրողություններն ընդունում է որպես ցեղասպանություն: Բայց Օբաման պետք է իր խոստումը պահեր»,- ասում է Կ. Քամարյանը: