Պաշտոնական Դամասկոսը արևմտյան մայրաքաղաքների հետ բաց է ցանկացած կառուցողական երկխոսության համար, սակայն արևմտյան կառավարությունների հետ քննարկումն անհնար է, քանի դեռ նրանք ուղիղ կերպով աջակցում են Սիրիայում գործող ահաբեկիչներին: Այսպիսի դիրքորոշում է հայտնել Սիրիայի նախագահ Բաշար Ասադը ֆրանսիական «Ֆրանս-2» հեռուստաալիքին տված հարցազրույցում:
Ասադը նշել է, որ առարկայական քննարկման մասին խոսելու համար արևմտյան երկրները նախ «պետք է համոզեն, որ չեն աջակցում Սիրիայում զինված խմբավորումներին, և որ իրենք մասնակից չեն արյունահեղությանը» Սիրիայում: «Այդ նրանք են սխալվել Սիրիայի հարցում՝ մենք չենք սպանել ոչ մի ֆրանսիացու, ոչ մի եվրոպացու, մենք ահաբեկիչ չենք եղել ձեր երկրներում»,- նշել է Ասադը:
Ասադի խոսքով՝ իր կառավարությունն ընդհանուր առմամբ պատրաստ է «ցանկացած երկխոսության՝ հաշվի առնելով, որ այն կկառուցվի ի շահ Սիրիայի քաղաքացիների»: «Մենք հետաքրքրված ենք երկխոսությամբ ում հետ հարմար է: Բայց ինչպե՞ս կարելի է երկխոսության մեջ մտնել կառավարության հետ, որն աջակցում է ահաբեկչությանը մեր երկրում: Եվ ինչի՞ համար: Եթե նրանք փոխեն իրենց քաղաքականությունը, մենք պատրաստ կլինենք երկխոսություն վարել»:
Ասադը նաև կտրականապես հերքել է արևմտյան դիտորդների մեղադրանքները, թե՝ սիրիական բանակը վերջին ամիսներին բազմիցս քիմիական զենք է կիրառել ընդդիմադիրների հետ մարտերի ընթացքում: «Դրանք սուտ տեղեկություններ են, որոնք տարածում են արևմտյան կառավարությունները»,- ասել է Սիրիայի նախագահը՝ պատասխանելով մարտ ամսին Իդլիբ քաղաքի համար մարտերի ժամանակ քլորի հիմքով քիմիական զենքի հնարավոր կիրառման մասին լրագրողի հարցին:
Ասադը նշել է, որ Սիրիայի տարածքում այդ թունավոր նյութն արտադրող ընդամենը երկու գործարան կա: «Մեկը փակվել է մի քանի տարի առաջ և այլևս չի գործում, մյուսը՝ ամենամեծ գործարանը, գտնվում է Սիրիայի հյուսիսում՝ թուրքական սահմանի մոտ, և արդեն 2 տարի ահաբեկիչների վերահսկողության տակ է»,- նշել է նա:
Ասադի խոսքով՝ Դամասկոսից դրա վերաբերյալ պաշտոնական փաստաթղթեր են ուղարկվել ՄԱԿ: «Նրանցից պաշտոնական պատասխան է ստացվել, որի համաձայն՝ իրենց հնարավոր չի եղել հասնել գործարանին,- նկատել է Ասադը:- Այդպիսով՝ Սիրիայում քլորը ընդդիմադիրների վերահսկողության տակ է»:
Սիրիայի նախագահը նշել է, որ իր երկրի բանակը «շատ ավելի արդյունավետ սովորական զենքեր» ունի, ուստի անհրաժեշտություն չունի դիմելու այնպիսի միջոցների, ինչպիսին է թունավոր գազերի հիման վրա արգելված զենքը: «Մենք քլոր չենք կիրառել, և մեզ դա պետք չէ: Մենք դասական զենք ունենք և կարող ենք լուծել մեր խնդիրները՝ առանց քիմիական զենքի դիմելու: Ոչ մի ապացույց չկա»,- նշել է Բաշար Ասադը: