Ընդհանուր իրավասության դատարանում Վաղինակ Մկրտչյանի նախագահությամբ ընթանում է Էդուարդ Ա.-ի, Արմեն Ք.-ի և Հայկանուշ Ն.-ի գործի դատական քննությունը:
Ըստ մեղադրանքի՝ 35-ամյա Էդուարդը , հանդիսանալով նախկին կնոջից իրենց երկու դուստրերին վերցնելու քաղաքացիական գործով հայցվոր, այդ գործն իր օգտին լուծելու նպատակով Հայկանուշ Ն.-ին 2013 թվականի հուլիսի 15-ին ներկայացրել է քաղաքապետին կից խնամակալության և հոգաբարձության հանձնաժողով և խնդրել է, որ հանձնաժողովի նիստի ընթացքում վերջինս հայտնի իրականությանն ակնհայտորեն չհամապատասխանող, մտացածին տեղեկություններ՝ իր նախկին կնոջ՝ մարմնավաճառուհի լինելու վերաբերյալ:
Այդ նիստի ձայնագրության խտասկավառակը որպես ապացույց սեպտեմբերի 10-ին Էդուարդ Ա.-ն ներկայացրել է դատարան՝ նոր կեղծ ապացույց ստեղծելու եղանակով քաղաքացիական գործի դատական քննության ընթացքում կեղծել է ապացույց:
Բացի դրանից, Էդուարդ Ա.-ն նույն նպատակով իր ծանոթ Արմեն Ք.-ին խնդրել է, որ քաղաքացիական գործի դատական քննության ժամանակ նա իրականությանը չհամապատասխանող տեղեկություններ հայտնի այն մասին, որ Էդուարդի նախկին կինը մարմնավաճառուհի է, ինքը նրա հետ «Լիլիթ» հյուրանոցում 10 հազար դրամով սեռական հարաբերություններ է ունեցել:
Արմեն Ք.-ն այս կեղծ ցուցմունքը դատարանում տվել է 2013 թվականի հոկտեմբերի 7-ի նիստի ժամանակ:
Կեղծ վկայությունները և ապացույցները հիմք են ընդունվել դատարանի կողմից, և 2013 թվականի հոկտեմբերի 22-ին դատարանը վճռել է բավարարել Էդուարդ Ա.-ի հայցը, անչափահաս երկու երեխաների բնակության վայր է սահմանել հոր՝ Էդուարդ Ա.-ի բնակության վայրը:
Էդուարդ Ա.-ին մեղադրանք է առաջադրված ՀՀ քրեական օրենսգրքի 349 հոդվածի 1-ին, 38-338 հոդվածի 1-ին մասերով:
Ամբաստանյալի աթոռին Էդուարդի հետ նստած են նաև նրա «կազմակերպած» վկաները, ովքեր նախազգուշացված լինելով սուտ ցուցմունք ու վկայություն տալու համար նախատեսված քրեական պատասխանատվության մասին, սուտ ցուցմունքներ են տվել կամ օժանդակել են կեղծ ապացույց ստեղծելուն:
Մասնավորապես՝ 40-ամյա Հայկանուշը օժանդակել է քաղաքացիական գործի շրջանակներում Էդուարդ Ա.-ի կողմից ապացույցներ կեղծելուն: Նա խնամակալության և հոգաբարձության հանձնաժողովի նիստի ժամանակ հայտնել է Էդուարդի և իր կողմից նախապես հորինված, իրականությանը չհամապատասխանող պատմություն, իբր՝ Էդուարդի նախկին կինն իր հետ միասին զբաղվել է մարմնավաճառությամբ, տղամարդկանց հետ հանդիպումներին նա հետը նույնիսկ տարել է անչափահաս դստերը…
Հայկանուշ Ն.-ին մեղադրանք է առաջադրվել ՀՀ քրեական օրենսգրքի 38-349 հոդվածի 1-ին մասով:
Ըստ մեղադրանքի՝ 30-ամյա Արմեն Ք.-ն դատարանում սուտ ցուցմունք է տվել, իբր՝ Էդուարդի նախկին կնոջը ճանաչում է որպես մարմնավաճառուհու, նրա հետ ծանոթացել է իրական մարմնավաճառուհի Հայկանուշի տանը: Էդուարդի նախկին կնոջ հետ ինքը գնացել է հյուրանոց, սեռական հարաբերություններ է ունեցել՝ վճարելով տասը հազար դրամ:
Արմեն Ք.-ին մեղադրանք է առաջադրվել ՀՀ քրեական օրենսգրքի 338 հոդվածի 1-ին մասով:
Ամբաստանյալների խափանման միջոցը ստորագրությունն է չհեռանալու մասին: