Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ ավարտվեց Ռոման Դավթյանի գործի դատական քննությունը:
Ըստ մեղադրանքի՝ 2014 թվականի մարտի 6-ին, առավոտյան ժամը 8-ին Երևան քաղաքի «Կարմիր բլուր» գերեզմանատան տարածքում Ռոման Դավթյանն իր կողմից օգտագործվող «Ֆոլքսվագեն գոլֆ» մեքենայի մեջ Լիանա Պ.-ի առողջության համար վտանգավոր բռնություն գործադրելով՝ բռունցքներով հարվածել է նրա դեմքի ու մարմնի տարբեր մասերին, նրա առողջությանը զույգ ակնակապիճների ստորին կոպային շրջանների արյունազեղումների, գանգուղեղային տրավմայի, քթոսկրի կոտրվածքի ձևով պատճառել է թեթև վնաս՝ առողջության կարճատև քայքայումով:
Այնուհետև, առաջադրված մեղադրանքի համաձայն, Ռոմանը մեքենայի սրահի վահանակի վրայից վերցրել է Լիանայի դրամապանակը, դրա միջից հափշտակել է 10 հազար դրամ և իր մոտ գտնվող, որպես զենք օգտագործված «Մակարով» տեսակի օդամղիչ ատրճանակով դիտավորությամբ կրակել է Լիանայի ճակատին ու աջ ոտքին՝ գլխի ճակատային հատվածի և աջ սրունքի սալջարդ վերքերի ձևով տուժողի առողջությանը պատճառել է թեթև վնասի հատկանիշներ չպարունակող վնասվածքներ:
Այս ամենից հետո, ըստ մեղադրանքի, Ռոման Դավթյանը մարմնավաճառությամբ զբաղվող Լիանա Պ.-ին տեղափոխել է Երևան քաղաքի Բագրատունյաց պողոտա ու հեռացել է:
Ռոման Դավթյանը իր մեքենայով տաքսու ծառայություններ է մատուցել, այդ թվում՝ հնագույն արհեստով զբաղվող կանանց, Լիանան այդ առումով է պարտք եղել Ռոմանին…
Ռոման Դավթյանին մեղադրանք է առաջադրվել զենքի գործադրմամբ ավազակային հարձակում կատարելու համար՝ ՀՀ քրեական օրենսգրքի175 հոդվածի 2-րդ մասի 4-րդ կետով:
Որպես իրեղեն ապացույցներ՝ քրեական գործին կցված են ամբաստանյալի և տուժողի հագուստները, «Մակարով» մոդելի ատրճանակը, տուժող Լիանա Պ.-ի ճակատից հանված գնդակը…
Լիանայի բախտից՝ օդամղիչ զենքը նոր չի եղել, գնդակը մտել է նրա ճակատի մաշկի տակ ու կանգ է առել, չի հաղթահարել գանգոսկրի կարծրությունը…
Մեղադրողը միջնորդել էր Ռոման Դավթյանին դատապարտել 8 տարի 6 ամիս ազատազրկման:
Դատարանը 30-ամյա Ռոմանին մեղավոր ճանաչեց մեղսագրված արարքների համար և դատապարտեց 8 տարի ազատազրկման: