Թուրքիայում գործող ազգայնամոլական «Թուրքական օջախներ» կազմակերպությունը ներկայիս Թուրքիայի Էրզրում (Կարին) նահանգի Ալաջա գյուղում հայատյաց միջոցառում է կազմակերպել, որի ժամանակ «հիշել են հայերի կողմից կոտորածի ենթարկված թուրքերին»:
Թուրքական «Իհլաս» գործակալության փոխանցմամբ՝ միջոցառումն անցկացվել է կազմակերպության ղեկավար Մեհմեթ Օզի գլխավորությամբ և ՏԻՄ ներկայացուցիչների մասնակցությամբ:
Ներկաները հավաքվել են գյուղում տեղադրված հուշարձանի մոտ, որը նվիրված է «հայերի սպանած 278 մուսուլման թուրքերի հիշատակին»: Միջոցառման մասնակիցները, որոնց թվում է եղել նաև Էրզրումի Աթաթուրքի անվան համալսարանի հայ-թուրքական հարաբերությունների ուսումնասիրությունների կենտրոնի ղեկավար Էրոլ Քյուրքչուօղուն, մի շարք ծանր մեղադրանքներ են ուղղել հայերին՝ պատմությունը խեղաթյուրմամբ թուրքերի փոխարեն հայերին դահիճի դերում ներկայացնելով:
Նշենք, որ թուրքական իշխանությունների բարձր հովանու ներքո Թուրքիայում հաճախ են Արևմտյան Հայաստանի այս կամ այն շրջանը հայերից խլելու առթիվ նմանօրինակ՝ հայերի դեմ թշնամություն և ատելություն սերմանող միջոցառումներ կազմակերպվում։ Այս տարի նման միջոցառումներ մեծ հնչեղությամբ անցկացվում են հատկապես Էրզրումի նահանգում: