Թուրքիայի նախագահ Թայիփ Էրդողանն ապրիլի 17-ին Քոջաելի քաղաքում խոշոր հանրահավաքի ժամանակ կտրուկ քննադատել է երկրի խորհրդարանի քրդական «Ժողովուրդների դեմոկրատական» կուսակցության համանախագահ Սելահեթթին Դեմիրթաշին, ով Հայոց ցեղասպանությունը ճանաչող հայտարարություններ էր արել: Այս մասին տեղեկացնում է թուրքական «Անադոլու» լրատվական գործակալությունը:
«Ահաբեկչական կազմակերպության (ի նկատի ունի «Քրդստանի աշխատավորական կուսակցությունը», PKK) գլխավորությամբ քաղաքականություն իրականացնող կուսակցության ղեկավարը (Դեմիրթաշը—խմբ.) հայկական զրպարտություններին է տեր կանգնել: Հիմա էլ Վատիկանի մամուլի պատասխանատուն է դարձել: Թուրքիայի խորհրդարանում երեք կուսակցություն միասին հայտարարություն են պատրաստում, ահաբեկչական կազմակերպության ներկայացուցիչ կուսակցությունը չի ստորագրում այն»,-նշել է Էրդողանը՝ «ահաբեկչական կազմակերպության ներկայացուցիչ» անվանելով «Ժողովուրդների դեմոկրատական» կուսակցությանը:
Հիշեցնենք, որ Թուրքիայի ազգային մեծ ժողովն օրերս ընդհանուր հայտարարությամբ քննադատել է Եվրախորհրդարանի՝ ապրիլի 15-ի լիագումար նիստում Հայոց ցեղասպանության 100-րդ տարելիցի թեմայով քննարկումներից հետո ընդունած Հայոց ցեղասպանության մասին բանաձևը։ Բացի քրդական «Ժողովուրդների դեմոկրատական» կուսակցությունից, Թուրքիայի խորհրդարանում ներկայացված մյուս երեք կուսակցությունները՝ «Արդարություն և զարգացում», «Ժողովրդահանրապետական» և «Ազգայնական շարժում» կուսակցությունները, ԹԱՄԺ նախագահ Ջեմիլ Չիչեքի գլխավորությամբ, վերոնշյալ բանաձևի վերաբերյալ փաստաթուղթ են ստորագրել, որը քննադատում է ԵԽ-ի սույն որոշումը։
Հավելենք, որ Էրդողանը նույն այս ելույթի ժամանակ անդրադարձել էր նաև Հայաստանի հետ հարաբերությունների, Ցեղասպանության միջազգային ճանաչման, Թուրքիայում աշխատող հայաստանցի ներգաղթյալների թեմաներին:
Էրդողանը հայ-թուրքական հարաբերությունների կարգավորումը կրկին կապել է Արցախյան հակամարտության, ինչպես նաև Ցեղասպանության հարցում պաշտոնական Երևանի քաղաքականության հետ:
«Հայաստանի համար մեր դուռը դեռ բաց է: Եթե, այսպես կոչված, ցեղասպանության (Հայոց ցեղասպանության-խմբ.) կամ Արցախի բռնազավթման հարցում դրական քայլեր լինեն, ապա պատրաստ ենք ցանկացած տիպի համագործակցության: Եթե այս կամքն ու խիզախությունը ցուցաբերեն, ապա պատրաստ ենք բանակցել հայ քաղաքական գործիչների, Հայաստանի իշխանությունների հետ: Սակայն դրանից առաջ պետք է լուծվի Արցախի հարցը»,-հայտարարել է Թուրքիայի նախագահը՝ նշելով, թե «այստեղից իր կոչն է հղում բոլոր հայերին»:
Ցեղասպանության հարցին անդրադառնալիս Էրդողանը կրկին կիրառել է ժխտողական մոտեցում, ընդ որում, կոչ անելով հայերին հրաժարվել պայքարից, ինչը, իբր, վնասում է հենց հայերին:
«Այստեղից բոլոր հայերին, ամբողջ աշխարհին եմ կոչ անում: Այս հարցը (Ցեղասպանության հարցը-խմբ.) ամբողջովին կտրվել է պատմական արմատներից և քաղաքականացվել է: Այս ամենից էլ ամենաշատը հայերն են տուժում: Գիտենք, որ նման որոշումներ կայացնողների հիմնական նպատակը հայերի իրավունքների պաշտպանությունը չէ»,-նշել է Էրդողանը, ապա կրկին խոսել Թուրքիայում աշխատող ՀՀ քաղաքացիների մասին.
«Մեկ էլ Հայաստանից փախած և մեր երկրում հյուրընկալված հայեր կան: Մենք նրանց դեմ որևէ բան արե՞լ ենք: Մենք նրանց հյուրընկալել ենք, այնպես չէ՞…»,-հայտարարել է Էրդողանը:
