Կոտայքի մարզի ընդհանուր իրավասության դատարանում Վարդան Ստեփանյանի նախագահությամբ ընթանում է Ռուզաննա Մանուկյանի գործի դատական քննությունը:
Ռուզաննա Մանուկյանը Հրազդանի պետական բժշկական քոլեջի տնօրենն է եղել:
Ըստ մեղադրանքի՝ 2012-2013 ուսումնական տարվա պետական ավարտական քննություններից առաջ, «Տեսական գիտելիքների ստուգում» ավարտական պետական քննությանը դրական գնահատականներ նշանակելու համար քոլեջի ավարտական խմբերի ուսանողներից քոլեջի տնօրենը որպես կաշառք շորթմամբ պահանջել է գումարներ:
Ըստ մեղադրանքի՝ Ռուզաննա Մանուկյանի ցուցումով հիշյալ քննությանը դրական գնահատականներ նշանակելու համար «Քույրական գործ» ավարտական խմբի 24 ուսանողներից նրանց դասղեկի միջոցով 2013 թվականի մայիսի վերջից մինչև հունիսի սկիզբը հավաքվել է 3 հազարական դրամ:
Հավաքված գումարը՝ 72 հազար դրամը, դասղեկը փոխանցել է քոլեջի փոխտնօրենին, վերջինս էլ հանձնել է տնօրեն Ռուզաննա Մանուկյանին:
«Տեսական գիտելիքների ստուգում» առարկայի ավարտական պետական քննության հաջորդ օրը՝ հունիսի 11-ին, Ռուզաննա Մանուկյանի ցուցումով փոխտնօրենը վերոհիշյալ խմբում հայտարարել է, թե ամբողջ խումբը քննությունը հանձնել է անբավարար, անհրաժեշտ է քննությունը վերահանձնել: «Վերահանձնելու» պայմանը եղել է այն, որ յուրաքանչյուր ուսանող պետք է նորից 3 հազարական դրամ հավաքեր:
24 ուսանողները հավաքել են ընդհանուր՝ 72 հազար դրամ: Գումարը հունիսի 17-ին ամբողջությամբ տրվել է Ռուզաննա Մանուկյանին: Բայց տնօրենը չի հասցրել որոշել՝ ուսանողները բավարար են ստանում, թե՞ անբավարար, որովհետև գումարն ստանալուց անմիջապես հետո ԱԱԾ աշխատակիցները տնօրենի մոտից հայտնաբերել են այն:
Նույն կերպ, ըստ մեղադրանքի, տնօրենի ցուցումով գումար էին հավաքել նաև «Մանկաբարձական գործ» ավարտական խմբի բոլոր 19 ուսանողները: Նրանց հավաքածը 57 հազար դրամ պիտի լիներ, բայց այդ գումարը դեռ ամբողջովին չհավաքված՝ տնօրենը բռնվել է «Քույրական գործ» խմբի գումարները վերցնելու համար:
45-ամյա Ռուզաննա Մանուկյանին մեղադրանք է առաջադրվել ՀՀ քրեական օրենսգրքի 200 հոդվածի 4-րդ մասով:
Ամբաստանյալի խափանման միջոցը ստորագրությունն է չհեռանալու մասին: