Մադրիդի «Ռեալ»-ի հարձակվող Քրիշտիանու Ռոնալդուն գոլի հեղինակ է դարձել Իսպանիայի առաջնության 32-րդ տուրի շրջանակներում կայացած «Մալագա»-ի դեմ հանդիպմանը` աչքի ընկնելով ավելացված ժամանակում: Այդպիսով, 30-ամյա Քրիշտիանուն դարձել է իսպանական ֆուտբոլի պատմության առաջին ֆուտբոլիստը, ով հատել է 50 գոլերի սահմանը 5 մրցաշրջաններում անընդմեջ:
Ընթացիկ մրցաշրջանում Ռոնալդուն իր ակտիվում է գրանցել 39 գոլ Իսպանիայի առաջնության խաղերում, 8 գոլ` Չեմպիոնների լիգայի գավաթի խաղարկությունում, 2 գոլ` ՈւԵՖԱ-ի սուպերգավաթի և 1-ը` Իսպանիայի գավաթի խաղարկության հանդիպումներում:
Հանդես գալով «արքայական ակումբ»-ի կազմում Ռոնալդուն չի հատել մեկ մրցաշրջանում 50 գոլերի սահմանը միայն մեկ անգամ` «Ռեալ»-ի կազմում անցկացրած իր առաջին մրցաշրջանում (2009/10թթ) հարձակվողը 33 գոլ է խփել:
Ռոնալդուն նաև 67-րդ րոպեին վրիպել է 11 մետրանոց նշակետից: Վերջին անգամ նա չի կարողացել իրացնել 11 մետրանոցը 2014 թվականի հոկտեմբերի 1-ին` Չեմպիոնների լիգայի գավաթի խաղարկության խմբային փուլի «Լուդոգորեց»-ի դեմ արտագնա հանդիպմանը: