Իրանը պատրաստ է համագործակցել բոլոր երկրների հետ բռնության, ծայրահեղականության և ահաբեկչության դեմ պայքարում: Այս մասին շաբաթ օրը հայտարարել է Իրանի նախագահ Հասան Ռուհանին` Թեհրանում պաշտոնական այցով գտնվող Ավստրալիայի արտաքին գործերի նախարար Ջուլի Բիշոպի հետ հանդիպման ժամանակ, գրում է TASS-ը:
«Իրանի Իսլամական Հանրապետությունն ահաբեկչության և ծայրահեղականության դեմ պայքարում պատրաստ է համագործակցել բոլոր երկրների հետ, ներառյալ` Ավստրալիայի: Իսկ ահաբեկչության դեմ պայքարելու և այն արմատախիլ անելու համար անհրաժեշտ է բոլորին հաղորդակցվելով պարզել ահաբեկչության նախապատճառները և դադարեցնել անփորձ երիտասարդների` ահաբեկչական խմբերում հավաքագրումը»,- ասել է Ռուհանին:
Ներկայումս ահաբեկչությունը սպառնալիք է դառնում ոչ միայն Մերձավոր Արևելքի, այլև ամբողջ աշխարհի համար, ընդգծել է Ռուհանին:
Ռուհանիի խոսքերով` անհրաժեշտ է նաև լուծել փախստականների և տեղափոխվող անձանց խնդիրը, ովքեր տուժել են Սիրիայում և Իրաքում ահաբեկչական խմբավորումենրի գործողություններից: Հակառակ դեպքում այդ մարդիկ ևս կարող են միանալ ահաբեկիչներին:
