«Մոտ մեկ տարի առաջ ծագեց այս միտքը՝ անել նմանատիպ նախագիծ։ Միանգամից երեքով՝ Կարեն Մարգարյանը, Տիգրան Պետրոսյանը և ես սկսեցինք զարգացնել այս միտքը, և ի սկզբանե որոշված էր, որ երգը պետք է լինի հենց անգլերեն, որ ավելի մատչելի լինի աշխարհի տարբեր երկրներում ապրող մարդկանց համար և սկսվեցին աշխատանքները։ Հասկանում եք, անգամ մեկ տարին քիչ էր, այնքան ծավալուն էր աշխատանքը»,- այսօր Հայոց ցեղասպանության 100-րդ տարելիցին նվիրված «Միլիոնավոր կյանքեր» տեսահոլովակի պերմիերային ասաց ծրագրի տնօրեն Գրիշա Աղախանյանը:
Տեսահոլովակի նկարահանումները կատարվել են Ֆրանսիայում, Շվեյցարիայում, Ռուսաստանում, Հայաստանում, և ԱՄՆ-ում։
«Առաջին հերթին գրվեց երաժշտությունը, Կարեն Մարգարյանը գրեց գեղեցիկ երգ։ Հետո Կարենն արեց գործիքավորումը, որից հետո սկսեցինք ձայնագրություններն ու նկարահանումները։ Միհրանը, տեսահոլովակի հետ կապված միշտ մեր կողքին էր, ի վերջո ունենք այն տեսահոլովակը, որ տեսաք»,- նշեց նա։
Ծրագրի տնօրեն, երգիչ և երգահան Տիրգան Պետրոսյանն էլ նշեց, որ երգը ոչ մի լաց իր մեջ չի պարունակում։
«Եթե ուշադիր լինեք բառերին, ընդհակառակն, իր մեջ կա լավատեսություն, առաջ նայելու մղում։ Ինձ թվում է՝ բոլոր հայերի երազանքը Ցեղասպանության ճանաչումն է։ Տեսահոլովակի ընթացքում տեսաք, որ էկրանի տարբեր անկյուններում միշտ հայտնվում էր «Հիշում եմ և պահանջում» կարգախոսը»,- ասաց նա։
Ավելին՝ տեսանյութում: