Եվրոպայում բնակվող թուրքերը բողոքի ակցիա են անցկացրել բելգիական Մեխելեն քաղաքում՝ Հայոց ցեղասպանության զոհերի հիշատակին հուշարձան տեղադրելու նախաձեռնության դեմ: Այս մասին տեղեկացնում է «Դողան» լրատվական գործակալությունը:
Բողոքի ակցիան Եվրոպայի թուրք դեմոկրատների միության գլխավորությամբ կազմակերպել են մի շարք թուրքական կազմակերպություններ և անհատներ:
Թուրքերը ապրիլի 17-ին հավաքվել են Մեխելենի քաղաքապետարանի դիմաց: Վերջիններս պարզել են Թուրքիայի մեծ ու փոքր դրոշներ և քաղաքային իշխանություններին կոչ արել հրաժարվել Ցեղասպանության զոհերին նվիրված հուշարձանից:
Հավաքվածներն իրենց կոչը կարդացել են թուրքերենով և ֆլամանդերենով: Ավելի ուշ թուրքերը լքել են քաղաքապետարանի տարածքը՝ հնչեցնելով «ամեն ինչ հայրենիքի համար» կոչը:
Դեռ հայտնի չէ, թե ինչպես են բելգիական քաղաքում պատրաստվում արձագանքել թուրքերի բողոքին:
Նշենք, որ Եվրոպայում բնակվող թուրքերը հաճախ են հակահայ ցույցեր և միջոցառումներ անցկացնում, իսկ Ցեղասպանության 100-րդ տարելիցին ընդառաջ թուրքերի հայատյաց գործողությունները եվրոպական քաղաքներում միայն զգալի աճ են արձանագրել: