Օստեոգեն սարկոման ոսկրերի առավել հաճախ հանդիպող չարորակ ուռուցք է, որն ախտահարում է հիմնականում վերջույթները: Հիվանդությունը, որպես կանոն, ախտահարում է երեխաներին և դեռահասներին:
Ուռուցքն ամենից հաճախ տեղակայվում է երկար խողովակավոր ոսկրերի մետաֆիզներում։ Օստեոգեն սարկոմաների մոտ 80 տոկոսը հանդիպում է ծնկային հոդի շրջանում, ավելի հազվադեպ կոնքի և այլ ոսկրերում։ Այս հիվանդությանը բնորոշ է չափից ավելի ագրեսիվ ընթացքը:
Ախտանշաններն են՝ վերջույթի ծավալի մեծացում ուռուցքի պրոյեկցիայով, անոթային պատկերի ուժեղացում, մկանների ատրոֆիա։ Հաճախ դիտվում է մոտակա հոդի շարժումների սահմանափակում, լինում են նաև պաթոլոգիկ կոտրվածքներ։
Մինչև վերջերս, օստեոգեն սարկոմայի ախտորոշման դեպքում կատարվում էին անդամահատումներ: Ներկայումս կիրառվում է նորագույն օրգանապահպան բուժման մեթոդ՝ ախտահարված ոսկրի հատվածի հեռացում, հետագա արհեստական՝ մեգաէնդոպրոթեզավորման վերականգնմամբ: Այդ մեթոդի կիրառումը թույլ է տալիս պահպանել աշխատունակ վերջույթը, միևնույն ժամանակ պահպանելով ուռուցքաբանության կողմից ներկայացվող արմատականության կանոնները:
Հիվանդը, չորս կուրս քիմիաթերապիայից հետո վիրահատվել է 2013 թվականին։ Միջանկյալ վիրահատության ընթացքում հեռացվել է ազդոսկրի ուռուցքը, տեղադրվել է ժամանակավոր սարք, որի օգնությամբ դեղորայքային բուժման ընթացքում հիվանդը քայլել է։
Բուժումից հետո իրականացվում է վիրահատական երկրորդ փուլը՝ ոսկրահոդային դեֆեկտի վերականգնում էնդոպրոթեզավորման եղանակով։
Վիրահատությունը կատարում է «Նաիրի» ԲԿ-ի Օնկոօրթոպեդիայի ծառայության ղեկավար, բ.գ.թ. Գալուստ Հարությունի Գալուստյանը։