ԱՄՆ-ի 13 համայնքային կազմակերպություններ նամակ են նախապատրաստել ԱՄՆ նախագահ Բարաք Օբամային, որտեղ կոչ են արել նրան հավելյալ միջոցներ ձեռնարկել Ուկրաինային աջակցելու համար: Այդ մասին հաղորդում է ուկրաինական համայնքի VIDIA կայքը:
Մասնավորապես նշվում է, որ խնդրել են հավելյալ ֆինանսական օգնություն, պաշտպանական տեխնիկա և Ռուսաստանի դեմ բազմակողմանի պատժամիջոցների սահմանում:
«Քանի որ Ուկրաինայում տիրող իրավիճակը շարունակում է ճգնաժամային մնալ, ԱՄՆ-ի ուկրաինական համայնքը՝ այլ էթնիկ փոքրամասնությունների համայնքների հետ, վճռական է Ուկրաինային աջակցելու հարցում և կոչ է անում ԱՄՆ-ին ճանաչել տարածաշրջանում առկա ճգնաժամը, ամրապնդել իր աջակցությունը Ուկրաինայի անկախությանն ու տարածքային ամբողջականությանը»,- ասվում է հաղորդագրությունում:
Նամակը ստորագրել են 13 կազմակերպություններ, որոնց թվում են Ամերիկյան հրեական հանձնաժողովը, Ամերիկայի հայկական ասամբլեան, Բելառուսա-ամերիկյան ասոցիացիան, Չեխոսլովակիայի ամերիկյան խորհուրդը, Միացյալ Նահանգներում վրացական միությունը, Հունգարա-ամերիկյան կոալիցիան, Միացյալ բալթիա-ամերիկյան հանձնաժողովը, Լիտվա-ամերիկյան միությունը, Լեհական ամերիկյան կոնգրեսը, Ամերիկայի սլովակյան լիգան և Ամերիկայի ուկրաինական կոնգրեսական հանձնաժողովը:
