«Առաջին լրատվական»-ի զրուցակիցն է Հայկական վերածնունդ շարժման Փարիզի մասնաճյուղի պատասխանատու Շանթ Ոսկերչյանը:
–Պարոն Ոսկերչյան, «Հիմնադիր խորհրդարանի» 5 անդամների ձերբակալությունից հետո անորոշ է, թե ի՞նչ քայլեր են իրականացնելու մյուս անդամները: Նշվում է, որ իրենք 2.5 տարի պլան էին մշակվել և որոշակիորեն կանխատեսել էին այս ձերբակալությունները: Ի վերջո ո՞րն է շարժման պլան Բ-ն:
–Այո , իրավացի եք ՝ «Նախախորհրդարանը», հետագայում՝ «Հիմնադիր խորհրդարանն» աշխատել են այս ուղությամբ: Մենք այս տեսակի պետություն չենք ուզում՝ տնտեսագիտությունից մինչև բանակ ամեն ինչ մանրամասն քննարկվել է: Այդ քննարկումներին մասնակցել են նաև սփյուռքի մասնագետներ, մենք ևս մեր կարծիքներն ու տեսակետները ներկայացրել ենք: Կարծում եմ, Հայաստանի ժողովրդի 90 տոկոսից ավելին ուզում է ազատվել այս վարչակարգից: Մենք մտածել ենք` Սերժին կամ Ռոբին ճանապարհելուց հետո ինչ ենք ստանալու, ինչ ենք անելու: Ի վերջո, Սերժին ճամփելուց հետո դատարկ չենք կարող թողնել այդ տեղը, ամեն բան մտածված է, խելացի մարդիկ են աշխատել այս ծրագրերի վրա:
Մեր ընկերներին անհիմն պատճառներով են նստեցրել, բայց մենք հուսով ենք , որ իրենց ազատ կարձակեն: Մենք պլան Բ-ն էլ ունենք, պլան Ֆ-ն էլ առաջիկայում կտեսնեք:
–Մանրամասնեք՝որո՞նք են լինելու այդ գործողությունները, ի վերջո,ժողովուրդն ապրիլի 24-ին փողոց է դուրս գալու։ Ի՞նչ է ծրագրված անել:
-Իհարկե, մենք սպասում էինք նման գործողությունների, չէինք կարծում սակայն, որ այսպիսի զրպարտություններ կանեն: Իհարկե, իրենք էլ, մենք էլ՝ մի փոքր ճնշվեցինք, բայց հետո այդ ամենն անցավ. գործելու ժամանակն է: Ոչինչ չի հետաձգվում, այս ուրբաթ Ազատության հրապարակում, օրինակ, հանրահավաք են անելու, հետո երթ, ամսի 24-ին հեռվում հանրահավաք կանենք, 100 ամյակի արարողություններին չենք խանգարի: Սերժն ու իր բանդան խանգարեցին հարյուրամյակի միջոցառումներին, մարդկանց ուշադրությունն էլ ավելի կենտրոնացրեցին «Հիմնադիր խորհրդարան»-ի վրա: Հիմա ամեն մարդ մեր մասին գիտի և հաստատ կաջակցեն, ու մեր նախատեսածից ավելի շատ մարդ կգնա Էրեբունի՝ այդ օրվա հավաքին մասնակցելու: Մենք հաստատում ենք այն տեսակետը, որ անկարգություններ չեն լինելու, շուտով կհայտարարվի առաջնորդին փոխարինող մարդու անունը, և ամեն բան կգնա մեր ծրագրածի համաձայն: Մանրամասները Դուք ինքներդ էլ կտեսնեք:
–Իսկ սփյուռքն ինչքանո՞վ է ներգրավված այս գործընթացներում: Ժիրայր Սեֆիլյանը նաև սփյուռքին էր կոչ արել միանալու իրենց գործողություններին: Տեսնում ե՞ք նման ցանկություն, օրինակ ֆրանսահայերի մոտ:
–Այսօր Ֆրանսիայի փաստաբանների և իրավաբանների միությունն է հայտարարություն տարածել՝ խստիվ դատապարտելով «Հիմնադիր խորհրդարան»-ի անդամների դեմ իրականացված գործողությունները: Իրենք ի վերջո փաստաբան են՝ օրենքներն ավելի լավ գիտեն, մենք էլ բավականին մեծ ակցիաներ ենք կազմակերպել՝ շատերը մեզ միացան: Կիրակի օրը Փարիզի եկեղեցիների առջև ժողովրդին տեղեկացրեցինք, թե ինչ է կատարվում Հայաստանում: Հավանական է, որ եթե ապրիլի 25-ին կամ 26-ին քաղբանտարկյալներին ազատ չարձակեն՝ սփյուռքի անելիքները կսաստկանան: Մենք մինչև 25, 26 կսպասենք, եթե ազատ չարձակեն՝ այդ ժամանակ գրոհ կսկսենք: