Արցախի նախագահ Բակո Սահակյանի խոսնակ Դավիթ Բաբայանն արդեն իսկ հաստատել է, որ Բակո Սահակյանը ապրիլի 24-ին ներկա չի լինելու Երևանում անցկացվելիք Հայոց ցեղասպանության ոգեկոչման արարողություններին: Խոսնակը Բակո Սահակյանի բացակայությունը պայմանավորել է նրանով, որ այդ օրը Ստեփանակերտում բացվում է Ցեղասպանության առաջին հուշարձանը, որին Բակո Սահակյանը պետք է անպայման մասնակցի:
Արցախի խորհրդարանի անկախ պատգամավոր Վահան Բադասյանը չցանկացավ մեկնաբանել Սահակյանի չգալու փաստը, սակայն ավելացրեց, որ կարելի է հասկանալ նրա բացակայությունը: «Ծիծեռնակաբերդի հուշահամալիրը հիշատակի հուշահամալիր է, և նմանապես մեկն էլ Արցախում է բացվում: Եվ եթե Արցախի ժողովուրդն այստեղ է որոշել ոգեկոչել զոհերի հիշատակը, և Արցախի նախագահն էլ որոշել է մնալ իր ժողովրդի հետ, ապա ես դա նորմալ եմ համարում»,- ասաց Բադասյանը:
Ընդդիմադիր պատգամավորը անդրադառնալով այն փաստարկին, որ աշխարհի շատ երկրների առաջնորդներ ու պաշտոնյաներ այդ օրը Հայաստանում են լինելու, և այդ կոնտեքստում կարևոր էր նաև Բակո Սահակյանի ներկայությունը, նկատեց. «Գիտեք, այդ երկրների առաջնորդներն ու պաշտոնյաները պետք է գան Հայաստան և ներկա գտնվեն, բայց քանի որ Արցախը նույնպես Հայաստան է, հայկական հանրապետություն է, ապա տարբերություն չկա՝ Բակո Սահակյանը որտեղ կլինի: Եթե նա որոշել է մնալ Արցախում, դատապարտելի ոչինչ չկա»,- նկատեց Բադասյանը՝ հավելելով, որ Արցախի նախագահի բացակայության տակ ոչ մի ուրիշ, հատկապես դիվանագիտական պատճառներ պետք չէ փնտրել:
Բադասյանի խոսքով՝ առավել լավ կլիներ, որ այդ օրը Պուտինը առհասարակ Հայաստան չգար: Նա իր այդ քայլով ավելի ճիշտ կհարգեր հայ զոհերի հիշատակը, քանի որ Ցեղասպանության տարիներին ցարական Ռուսաստանը մեծապես համագործակցել է Թուրքիայի այն ժամանակվա կառավարության հետ: «Իսկ եթե գա, ապա պետք է ներողություն խնդրի հայ ազգից, որ Ռուսաստանը Թուրքիայի հետ ունեցած իր պրոբլեմները միշտ ցանկանում է լուծել հայկական տարածքների ու հայի արյան շնորհիվ»:
Քաղաքագետ Անդրեաս Ղուկասյանը ևս դատապարտելի ոչինչ չի տեսնում Արցախի նախագահի՝ ապրիլի 24-ին Երևանում չլինելու մեջ: Եթե այդ օրը Արցախում միջոցառումներ կան, ապա նախագահը պետք է լինի իր ժողովրդի հետ:
Քաղաքագետի խոսքով՝ մյուս կողմից՝ նախագահի ներկայությունը կարևոր էր այն կոնտեքստում, որ այդ օրը Հայաստանում աշխարհի շատ երկրների ներկայացուցիչներ են լինելու, և դա կարող էր ևս մեկ առիթ լինել՝ բոլորի ուշադրությունը սևեռելու Արցախի հարցի վրա:
«Ակնհայտ էր, որ այն քաղաքական գործընթացը, որ մեկնարկեց Վատիկանից և շարունակվեց ու հանգուցալուծում ստացավ Եվրախորհրդարանում, ներառում է հայ ժողովրդի քաղաքական օրակարգի հարցերը: Եվ բնական է, որ Բակո Սահակյանը եթե ներկա լինի այդ օրերին Հայաստանում, դա որոշակի մեսիջ կարող է լինել ողջ աշխարհին: Իսկ թե իրականում ինչու այդ օրը նա Հայաստան չի գալիս՝ դրա մասին ինֆորմացիա պետք է ունենալ, որը ես չունեմ»,- ասաց նա:
Արցախի «Ազգային վերածնունդ» կուսակցություն նախագահ Հայկ Խանումյանը, ով մասնակցում է Արցախի առաջիկա ընտրություններին, մեզ հետ զրույցում ասաց, որ «եթե նախագահն իր տեղում չէ, ապա բնավ կարևոր չէ, թե նա այդ օրը որտեղ է»: «Ես տեղյակ չեմ, թե ինչ է անում նախագահ Սահակյանը՝ առհասարակ նախագահո՞ւմ է երկիրը, թե՞ ոչ, ովքե՞ր են նրա խորհրդականները, ովքե՞ր են նրան խորհուրդ տալիս՝ ինչ անել, ուր գնալ: Այնպես որ՝ եթե նախագահն իր տեղում չէ, ապա թե նա ապրիլի 24-ին որտեղ է գտնվում՝ Ծիծեռնակաբերդում, թե Գալիպոլիում՝ այդքան էլ կարևոր չէ»,- ասաց Խանումյանը:
Նշենք, սակայն, որ Արցախի նախագահի բացակայությունը մեկնաբանվում էր այն կոնտեքստում, որ այդ օրը Երևանում են լինելու Ռուսաստանի ու Ֆրանսիայի նախագահները, իսկ Բակո Սահակյանը չի կարող նրանց հետ կանգնել նույն շարքում՝ հաշվի առնելով ԼՂ հակամարտության կարգավորման հարցում այդ երկու երկրների միջնորդական դերը:
