«Շանթ» հեռուստաընկերությամբ սկսել է եթեր հեռարձակվել «Խոպանի տեսություն» սերիալը, որն առաջացրել է բազմաթիվ ալավերդցիների զայրույթն ու դժգոհության մեծ ալիք բարձրացրել, քանի որ այնտեղ ներկայացված է մարզից Երևան եկած ալավերդցի ուսանողի կերպարը, որը ծաղրանքի առարկա է դարձնում ալավերդցիներին։
«Որպես ալավերդցի՝ «Շանթ» հեռուստաընկերությունից պահանջում եմ ներողություն խնդրել և այդ սերիալում այլևս չօգտագործել «Ալավերդի» բառն ու այսուհետ ներկայացնել հավաքական կերպար, և դա անել առավելագույնս զգույշ և ուշադիր»,- «Առաջին լրատվական»-ի հետ զրույցում ասաց լրագրող Արեն Մկրտչյանը՝ հավելելով, որ «Շանթ» հեռուստաընկերության սերիալների մեծ երկրպագու չէ, որպես մտահոգ ալավերդցի՝ դիտել է 2 սերիա:
Նրա խոսքով՝ կերպարը իրականության հետ աղերս չունի. «Սերիալում ալավերդցու կերպարը նույնականացվում է անտաշության, անճաշակության, աչքածակության, տեղ-տեղ նաև՝ մտավոր հետամնացության հետ: Այնինչ ալավերդցին իր մտավոր ունակություններով մի քանի անգամ գերազանցում է նման մտահղացումների հեղինակներին: Վերոնշյալ կերպարը վիրավորում է ալավերդցու պատիվն ու արժանապատվությունը, ոչ մի ընդհանուր եզր չունի ալավերդցու հետ»:
«Այո, ես ընդունում եմ, որ դա հումորային նախագիծ է, բայց բոլոր նախագծերում նշվում է ընդհանրական կերպար, օրինակ` լոռեցու կերպար: Բացի այդ, կերպարը ներկայացնելիս պետք է առավելագույն զգուշություն ցուցաբերել, քանի որ հատկապես մի ամբողջ մարզի կամ քաղաքի կերպար ներկայացնելիս անցումը հումորից վիրավորանքի շատ նուրբ է»,- ասաց Արեն Մկրտչյանը։
Նրա կարծիքով՝ կան նաև մի շարք բարդույթներ, որոնք ունենում են մարզից ուսման նպատակով Երևան ժամանած ուսանողները. «Այդ սերիալն ավելի է ամրացնում կարծրատիպերը, որոնք պատանին կամ երիտասարդը շատ մեծ դժվարությամբ են հաղթահարում: Պատկերացնո՞ւմ եք՝ 17-18 տարեկան աղջկա համար որքան բարդ է լինելու բուհում անել այնպես, որ իր անձը չնույնականացվի վերոնշյալ կերպարի հետ»:
«Առաջին լրատվական»-ի հետ զրույցում ալավերդցի ակտիվիստ Մարիաննա Պեպանյանը ևս շեշտեց, որ բացի այն, որ ալավերդցու կերպարը նեգատիվ տոնով է ներկայացված, կարելի է ասել, որ խորացնում է նաև կարծրատիպերը: Մարիաննան ասաց, որ ինքը ևս Երևանում սովորել է և ուսանելու սկզբնական շրջանում մի շարք բարդույթներ է ունեցել։ «Այսպիսի սերիալով, կարել է ասել, աղ են լցնում վերքի վրա։ Պետք է ներողություն խնդրեն։ Մարզից եկող ուսանողի են ներկայացնում, թող ընդհանրական ներկայացնեն, ինչո՞ւ հենց ալավերդցի, այն էլ՝ վիրավորական, տգեղ ձևով»,- ասաց նա:
Մ. Պեպանյանը մանրամասնեց՝ կոնկրետ սերիալի սցենարի մասին ընդհանուր ոչինչ չեն ասում, բայց ալավերդցի ուսանողի կերպարը իսկապես ոչ մի ընդհանրություն չունի իրենց՝ ալավերդցիների հետ։ «Ալավերդցիներին վիրավորում են, այդ աղջիկը հագնվում է շատ անճաշակ ու ցույց է տալիս, որ ալավերդցին այդպես է հագնվում, շատ տգեղ է խոսում։ Հիմա եթե Ալավերդի գան, հազիվ թե այսպես խոսող մարդ գտնեն, նույնիսկ տարածաշրջանի ամենածայրամասային գյուղում, կամ որ ուսանողը բարեկամներից փող է վերցնում՝ իբր ինքը փող չունի»:
Նա նաև շեշտեց, որ երբեք չի տեսել՝ գյուղերում երևանցիներին ծաղրեն, դա էթիկայի խախտում է. «Թող մի քիչ մտածեն սցենարը գրելիս, ինչքան մարդկանց արժանապատվությունն են վիրավորում։ Սերիալ ընդհանրապես չեմ նայում, բայց քանի որ ալավերդցու կերպար էր ներկայացված, մի անգամ նայեցի, բավականին վիրավորվեցի, և ինձ նման վիրավորված են շատերը»: