Խնդիրն արձանագրումն է, և Եվրախորհուրդն այն կառույցն է, որի որոշումներն ընդգծված իրավական որոշումներ են, և դա չի կարող սիրողական մակարդակի որոշում լինել: Բացի դրանից, Եվրախորհուրդը հաստատեց 87 թվականի իր իսկ բանաձևը:
Նման կարծիք հայտնեց ԱԺ նախագահ Գալուստ Սահակյանը՝ անդրադառնալով Եվրախորհրդարանի կողմից ընդունված հայոց ցեղասպանության ճանաչման բանաձևին, թե արդյո՞ք այն զուտ դեկլարատիվ բնույթից կարող է գործնական դառնալ:
Նա տեղեկացրեց, որ ապրիլի 21-ին, ժամը 12:00-ին, ԱԺ-ում արտահերթ նիստ կգումարվի և քվեարկության կդրվի Հայոց ցեղասպանության 100-րդ տարելիցի կապակցությամբ ԱԺ հայտարարության նախագիծը: Նրա խոսքով՝ այն պահին քվեարկության կդրվի, որն ավելի արդյունավետ կլինի:
«Շատ հնարավոր է՝ քննարկումներն այնպես գնային, որ հենց լիագումար նիստի հերթական քառօրյայում բանաձևն ընդունվեր, բայց երևի նախախնամություն կար, և ես կարծում եմ 21-ը հենց այդ պահն է, իսկ 22-ից հիմնական միջոցառումներն են իրականացվելու»,-ասաց նա:
Գալուստ Սահակյանն անդրադարձավ Էրդողանի հայ –թուրքական հարաբերությունների վերաբերյալ Ղազախստանում արած հայտարարությանը՝ պատմությունը թողնենք պատմաբաններին և նորմալ հարաբերություններ հաստատենք միմյանց հետ, նշեց.«Ծիծաղելի իրավիճակ է, քաղաքական պետական տրամաբանությամբ այդքան չի կարելի միանգամից ազդեցությունը, թեկուզև շատ ցավալի է իրենց համար, լիովին գրանցել իրենց պարտությունը, այն իմաստով, որ չի կարելի պապին քննադատել, չի կարելի աշխարհին քննադատել: Ստացվում է այնպես, որ միշտ ժամանակների ընթացքում աշխարհն է փորձել ներկայացնել թուրքական դիվանագիտությունը, այսօր կարծեք թե հոգեվարքի մեջ է մտել»,-ասաց Գալուստ Սահակյանը:
Ավելին՝ տեսանյութում: