«Այդ վեցյակից միայն Ռուսաստանն է քայլեր անում, որ չստացվի Իրան-Արևմուտք գործարքը: Դա նավթ ապրանքի դիմաց բարդերային գործարքն է, դա C-300 կայանների հետ կապված պայմանագիրն է, որը հաստատապես գրգռելու է Իսրայելին, ինչն այս պահին գոնե ոչ ԱՄՆ-ին է պետք, ոչ էլ Եվրոպային»,- Միջազգային և անվտանգության հարցերի հայկական ինստիտուտի կազմակերպած Տարածաշրջանի իրանական գարունը քննարկման ժամանակ ասաց փորձագետ Ռուբեն Մեհրաբյանը` անդրադառնալով Արևմուտքի կողմից Իրանի նկատմամբ պատժամիջոցները հանելու պայմանավորվածություններին:
Փորձագետի խոսքերով, այդ պայմանավորվածությունների կատարման արդյունքում տարածաշրջանում բացվում են նոր հնարավորություններ, բայց դրանք կշրջանցեն Հայաստանը, քանի դեռ մեր երկիրը չի փոխել իր հարաբերությունները Ռուսաստանի և «Գազպրոմի» հետ: Եվ փորձագետի կարծիքով, հայ-իրանական հարաբերություններում ՌԴ-ն թիվ մեկ խնդիրն է լինելու:
«Իրանը Հայաստանի համար թիվ մեկ առանց խնդիրների հարևանն է, ի տարբերություն մյուս երկու հարևանների: Մեր կողքը շրջում է ռուսական աշխարհի ուրվականը, թուրքական աշխարհի ուրվականը, շիա-սունիական հակամարտությունը: Մեզ պետք է դիվերսիֆիկացնել մեր անվտանգության համակարգը՝ ամրապնդելով դա թե քաղաքական, թե տնտեսական թե անվտանգության ռազմավարական պայմանավորվածություններով: Մեր կարևորագույն եզրակացություններից մեկը պետք է լինի այն, որ Հայաստանն այդ պայմանավորվածություններին մասը կազմի»,- եզրափակեց Ռ.Մեհրաբյանը: