Փոխոստիկանապետ Սամվել Հովհաննիսյանը լրագրողների հետ հանդիպման ժամանակ ներկայացրեց Ցեղասպանության 100-րդ տարելիցի միջոցառումների ընթացքում ոստիկանության ծառայությունների կողմից իրականացվելիք աշխատանքները:
«Ապրիլի 1-ից ոստիկանությունն անցել է ուժեղացված ծառայության, ապրիլի 5-ից ծառայություն է իրականացվում ծառայողական շներով, որքան մոտենա ապրիլի 24-ը, այնքան կխստացվեն հասարակական կարգի պահպանման վերաբերյալ պահանջները»,- ընդգծեց փոխոստիկանապետը:
Նա նաև շեշտեց, որ Հայոց ցեղասպանության 100-րդ տարելիցի միջոցառումներին ընդառաջ՝ ՀՀ ոստիկանության պետի առաջին տեղակալի մակարդակով ստեղծվել է աշխատանքային խումբ: Ստորաբաժանումներին հանձնարարականներ են տրվել հասարակական կարգի պահպանման վերաբերյալ:
Փոխոստիկանապետը ներկայացրեց ապրիլի 22-24-ին նախատեսված միջոցառումները. «Ապրիլի 23-ին Էջմիածին քաղաքում կլինի սրբադասման արարողություն, այնտեղ հսկողություն կսահմանվի: Սրբադասումը կսկսվի ժամը 21:30-ին և կտևի մոտ մեկ ժամ»:
Սրբադասման արարողությանը կարող են հետևել Էջմիածնում և Երևանի Հանրապետության հրապարակում տեղադրված հեռուստաէկրանների միջոցով, բացի այդ՝ ժամը 14-ին քաղաքացիներին ավտոբուսներով Բրազիլիայի հրապարակից անվճար կտեղափոխեն Էջմիածին:
Ապրիլի 23-ին առավոտից փակ կլինեն Հանրապետության հրապարակին հարող փողոցները: Նախատեսված է ռոք համերգ: Մուտքը կլինի միայն Ամիրյան և Տիգրան Մեծ պողոտայի կողմից: Սամվել Հովհաննիսյանը ասաց, որ մարդկանց մուտքը հրապարակ կլինի սահմանափակ թվով՝ կախված այդ պահի տարողունակությունից։ Նա նաև նշեց, որ հատուկ սարքով հնարավոր կլինի հաշվել քաղաքացիների թիվը:
Ապրիլի 24-ի առավոտյան արարողակարգային միջոցառումներ անցկացնելու համար Ծիծեռնակաբերդ տանող ճանապարհները փակ կլինեն, քաղաքացիների մուտքը կլինի Կիևյանի կողմից:
Փոխոստիկանապետը խնդրեց նաև քաղաքացիներին այդ օրերին միայն խիստ անհրաժեշտության դեպքում իրենց մեքենաները վարել, որպեսզի թե մեր քաղաքացիների և թե հյուրերի համար անհարմարություններ չստեղծվեն: