ՄԱԿ ԱԽ-ի բանագնացները լաց են եղել՝ ստանալով Սիրիայում ռազմական գործողությունների ժամանակ քլորից թունավորված երեխաներին փրկելու ապարդյուն փորձերի մասին վկայող տեսանյութը: Այս մասին հայտնում է Reuters-ը:
Ներկայացված փաստագրական տեսակադրերում պատկերված են բժիշկներ, որոնք փորձել են փրկել 1, 2, 3 տարեկան երեխաների, նրանց հարազատներին: «Քլորի կիրառումն իրականացվել է մարտի 16-ին՝ Իդլիբ նահանգի հյուսիսարևմտյան Սարմին գյուղում»,- հայտնում է գործակալությունը՝ հղում անելով բժիշկ Մուհամեդ Թենարիին, որը գլխավորում է այն հիվանդանոցը, որտեղ տեղափոխել են այդ հարձակման հետևանքով տուժածներին:
«Դա բավական յուրօրինակ և շատ զգացմունքային հանդիպում էր. եթե այնտեղ չոր աչքեր կային, ապա ես չեմ տեսել»,- ասել է ՄԱԿ-ում ԱՄՆ բանագնաց Սամանտա Փաուերը: Միաժամանակ հանդիպման մի քանի մասնակից ևս նշել են, որ «շատերը լաց են եղել»՝ տեսնելով ներկայացված տեսանյութերը:
Գործակալությունը նշում է, որ Սիրիայի կառավարությունը և զինված ընդդիմադիր ուժերը հերքել են հակամարտության ընթացքում քլորի կիրառման իրենց մասնակցությունը: Քիմիական զենքի արգելման կազմակերպության տեղեկությամբ՝ քլորով տարաները նետվել են ուղղաթիռներից: