«Առաջին լրատվական»-ի զրուցակիցն է ԱԺ ԲՀԿ խմբակցության պատգամավոր Ստեփան Մարգարյանը:
-Պարոն Մարգարյան, Իրանի միջուկային ծրագրի շուրջ բանակցությունների հաջող ավարտն ի՞նչ ազդեցություն կարող է ունենալ Հայաստանի համար, ի՞նչ նոր հնարավորություններ եք տեսնում հայ-իրանական հարաբերությունների զարգացման համար:
-Նախ` ցանկացած իրավիճակում որևէ հաջողություն կարելի է գրանցել ճիշտ աշխատելու, իրավիճակը ճիշտ գնահատելու և ճիշտ քայլեր անելու պարագայում: Կարծում եմ՝ չկա այնպիսի իրավիճակ, որից ինչ-որ օգուտ հնարավոր չլինի ստանալ ճիշտ քայլեր անելու դեպքում: Իրանի շուրջ այն, ինչ ծավալվում է, դեռևս մի քիչ շուտ է վերջնական համարել: Ես շատ ուրախ եմ, որ ընթանում է գործընթաց, որով հնարավոր է Իրանի նկատմամբ սանկցիաները կասեցվեն և Իրանը կդառնա շատ ավելի ազատ իր գործողություններում և հարաբերություններում: Մեզ համար, վստահ եմ, նոր հնարավորություններ այս իրավիճակում բացվում են, գոնե այնքանով, որ մենք ունենք երկու հարևան, որոնց հետ կարող ենք լուրջ հարաբերություններ ծավալել. Դա Իրանն է հարավում և հյուսիսում՝ Վրաստանը, բայց, ցավոք սրտի, Իրանի պարագայում ունենք մի բաց՝ մենք չունենք նորմալ կոմունիկացիաներ: Ես հույս ունեմ, որ Իրանի նկատմամբ սանկցիաների դադարեցումը մեր ճիշտ աշխատանքի պարագայում կարող է հանգեցնել նրան, որ հնարավոր լինի ինչ-որ ձևով միջոցներ հայթայթել, օրինակ, երկաթգիծ կառուցելու ուղղությամբ դեպի Իրան: Եվ եթե սա հաջողվի մեզ և եթե կարողանանք սա անել` սա մեծ հեռանկար կբացի մեզ համար ոչ միայն տնտեսական առումով, մենք կդառանանք այս տարածաշրջանում լուրջ դերակատարում ունեցող:
–Արդյոք Ռուսաստանը կթողնի՞ միայնակ որոշում կայացնել, իրանական հարաբերությունների զարգացման առումով ինքնուրույն որոշում կայացնել:
-Ես կարծում եմ, որ հնարավոր է կայացնել, ես չգիտեմ կանեն մերոնք, թե ոչ, կկարողանան, թե ոչ, ես տեսնում եմ պոտենցյալը, որ դա հնարավոր է, և ես կարծում եմ Ռուսաստանը ստեղծված իրավիճակում այնքան էլ դեմ չէ, եթե Իրան –Հայաստան-Ռուսաստան ինչ-որ առանցք ձևավորվի: Ես նաև Իրանի հետ հարաբերությունների հեռանկարը միայն գազով չեմ պայմանավորում, ես չգիտեմ մենք գազ կկարողանանք, թե չենք կարողանա ստանալ: Դա ևս տեսական հնարավորություն է, որովհետև բավականին լուրջ ուսումնասիրման աշխատանք կա, բայց գազն ընդամենը մի փոքր մասն է այդ հարաբերություններում: Այսօր մեզ համար երկու կարևոր խնդիր կա, որ բարդ է, բայց անհնար չէ լուծել. մեկը դեպի Իրան երկաթուղի ունենալու հարցն է, հյուսիսում` աբխազական երկաթուղին:
Ավելին՝ տեսանյութում: