«Ծրագիրը նախապես պատրաստված էր, և կար կառավարության հետ հանդիպում: Գաղտնիք չէ, որ շոու-բիզնեսի ներկայացուցիչներն այսօր բավականին պոպուլյար են, և ինքը կարդացվողների մեջ աշխարհում բավականին լուրջ տեղ է զբաղեցնում»,- Քիմ Քարդաշյանին ՀՀ կառավարության կողմից ընդունելություն կազմակերպելու մասին ասաց ԱԺ ՀՀԿ խմբակցության ղեկավար Վահրամ Բաղդասարյանը:
Նա նշեց, որ ինքը ողջունում է, եթե հայազգի որևէ աստղ այսօր իր ձեռքը պարզած ասում է՝ ես հայ եմ, և ուզում է ողջ աշխարհին մատուցել մեզ հետ 100 տարի առաջ կատարվածը:
«Բանից պարզվում է, որ իրենք բավականին հայրենասեր քույրիկներ են եղել: Ես այդ կարծիքն, անկեղծ ասած, չեմ ունեցել, ես նրանց որպես աստղ եմ վերաբերվել, մեկ-մեկ էլ ընթերցել եմ՝ ինչու չէ։ Բայց նա բավականին մոտ է կանգնած մեր պատմությանը, և նաև ինձ դուր է եկել այն պահը, որ նա ներողություն է խնդրում մայրենի լեզվով չխոսելու համար»,- հավելեց Բաղդասարյանը:
Պատգամավորը նաև հաղորդեց, որ երկու քույրերն էլ մայրենի լեզուն սովորելու մեծ ցանկություն են հայտնել:
Լրագրողի այն հարցին՝ արդյոք ՀՀԿ-ն Քիմ Քարդաշյանին չի՞ հրավիրի ԱԺ, Բաղդասարյանը պատասխանեց. «Դա հրավերով չի, նախօրոք ծրագիրը կազմվել է: Եղել է ծրագիր, որ ղեկավար մարմիններից մեկը պետք է ընդուներ, նպատակահարմար ենք գտել, որ գործադիր մարմինն ընդունի»:
«Յուրաքանչյուր դրական քայլ կնպաստի: Այ, եթե Դուք Ձեր հարցերը կրճատեք և մի քիչ այլ ուղղությամբ հարցեր տաք՝ դա էլ կնպաստի: Յուրաքանչյուր հայ կարող է նպաստել, մեկը՝ քիչ, մեկը՝ շատ»,- Հայոց ցեղասպանության ճանաչման գործում Քիմ Քարդաշյանի դերակատարության վերաբերյալ հարցին պատասխանեց քաղաքական գործիչը: