«Հովիկ Աբրահամյանը ընդունում է Քիմ Քարդաշյանին, այսինքն՝ ցույց են տալիս, որ անբարոյական կերպարին ընդունում են շատ լավ մակարդակով՝ հայկական տարազով, աղ ու հացով։ Այս մակարդակի ընդունելությունը ուղղակի ծաղր է մեր արժեհամակարգի համար»,- «Առաջին լրատվական»-ի հետ զրույցում ասաց «Ազգային արժեքների պահպանման ճակատ» ՀԿ նախագահ Սևակ Աղաջանյանը՝ հիշեցնելով, որ կառավարության առջև շաբաթ օրը հավաք են հրավիրել: Ըստ նրա՝ Քիմ Քարդաշյանին կառավարությունում ընդունելով՝ մեր արժեհամակարգը վտանգի տակ է դրվում:
Սևակ Աղաջանյանի կարծիքով՝ ծիծաղելի է նաև այն, որ այսօր շոու-բիզնեսի ներկայացուցիչները այնքան ոգևորված չեն Քիմ Քարդաշյանի այցով, որքան պետական այրերը, քանի որ Հովիկ Աբրահամյանը կառավարություն է հրավիրում, իսկ շոու-բիզնեսի ներկայացուցիչները՝ Ծղոտներ, ինչպես Սոս Ջանիբեկյանը գրել էր սոցցանցում:
«Մենք էլ ենք ողջունում, որ Քիմ Քարդաշյանը այցելում է, բայց խնդիրն այստեղ այն է, որ պետք չէ հայկական տարազով, աղ ու հացով պաշտոնապես դիմավորել, ընդունել»,- ասաց Սևակ Աղաջանյանը՝ հավելելով, որ ոչ ոք չի ասում, թե նրա գալը PR չէ, բայց որ այսպես շարունակվի՝ գուցե Մովսես Խորենացի մեդալ տան, շքանշաներ:
«14 -15 տարեկանները գոռում են՝ սիրում եմ Քիմին, ուզում եմ նմանվել նրան, այսինքն՝ մեր արժեհամակարգը ինչ-որ ձևով ոտնահարվում է»,- շեշտեց Սևակ Աղաջանյանը՝ հորդորելով պետական այրին եղածի վրա գոնե կանգ առնել և չշարունակել:
Ըստ նրա՝ վարչապետը Քիմ Քարդաշյանին ընդունելու ժամանակ գտնում է, իսկ սոցիալապես անապահովներին, ՓՄՁ ներկայացուցիչներին, որոնք կառավարության դիմաց հանդիպում են խնդրում՝ ոչ:
Մանրամասները ՝ տեսանյութում։