Վերջին օրերին նշանակալի իրադարձություններ տեղի ունեցան Հայաստանի համար մեծ կարևորություն ունեցող երկու ուղղություններով: Նախ՝ Հայաստանի նախագահ Սերժ Սարգսյանի` Չինաստան կատարած այցի ընթացքում ստորագրվեցին հայ-չինական համագործակցությունը նոր` աննախադեպ մակարդակի վրա դնող համատեղ հռչակագիր և շուրջ մեկ տասնյակ համաձայնագրեր, որոնցում շոշափված են Հայաստանի համար կարևորություն ներկայացնող բոլոր ասպեկտները` սկսած ռազմաքաղաքական, տնտեսական, էներգետիկ խնդիրներից, ավարտած մշակութային հարցերով: Ստորագրված բոլոր փաստաթղթերով Չինաստանն ամրագրում է իր պատրաստակամությունը Հայաստանում զգալի ներդրումներ կատարելու և տարբեր նախագծերի շրջանակներում լուրջ օժանդակություն ցուցաբերելու հարցում:
Նախօրեին էլ Լոզանում «Վեցյակի» և Իրանի միջև հաջողությամբ ավարտվեցին միջուկային ծրագրի շուրջ բանակցությունները, որոնց արդյունքների հետագա իրագործման դեպքում Իրանի վրայից փուլ առ փուլ կհանվեն միջազգային պատժամիջոցները: Բնականաբար, սա ևս Հայաստանի համար կարող է բացել հնարավորությունների նոր հեռանկարներ: ԱՆՏԻՆՈՄԻԱՅԻ տաղավարում այս երկու ուղղություններով ուրվագծվող նոր հեռանկարներն են քննարկում «Նորավանք» գիտակրթական հիմնադրամի տնօրեն Գագիկ Հարությունյանը և «Մոդուս վիվենդի» կենտրոնի ղեկավար Արա Պապյանը:
