Մայիսին Ռիգայում կայանալիք` Եվրամիության գագաթաժողովի գլխավոր ակնկալիքը Ասոցացման համաձայնագիր ստորագրած Վրաստանի և Ուկրաինայի համար ազատ վիզային ռեժիմի սահմանումն է:
Երկու երկրների լրատվամիջոցներն արդեն հաղորդում են, որ Եվրամիության հետ ազատ վիզային ռեժիմ չի սահմանվի:
Թբիլիսիի Եվրոպական ուսումնասիրությունների կենտրոնի ղեկավար Կախա Գոգոլաշվիլին «Առաջին լրատվական»-ի հետ զրույցում ասաց, որ, իսկապես, մայիսին Ռիգայում կայանալիք` Եվրամիության գագաթաժողովում Ուկրաինային և Վրաստանին ազատ վիզային ռեժիմ տրամադրելու որոշում չի լինի, և ինչ-որ առումով այս գագաթաժողովից վրացիներն այլևս ակնկալիք չունեն: Նրա խոսքերով՝ այս որոշումը կապված չէ այն բանի հետ, թե Վրաստանը չի կատարում իր առջև դրված պարտավորությունները: «Վրաստանը կատարում է այդ պարտավորությունները: Խնդիրը Եվրոպական Միությունն է, որտեղ նախազգուշանում են նման քայլ կատարելու հարցում»,- ասաց Գոգոլաշվիլին:
Նրա խոսքերով՝ հնարավոր չեղավ բարելավել Եվրոպական Միության անդամ երկրների հասարակությունների կարծիքը Վրաստանի և Ուկրաինայի ժողովուրդների նկատմամբ, և նրանք վտանգը հենց միգրանտների մեջ են տեսնում:
Մեր հարցին՝ ուրեմն ի՞նչ է ակնկալում Վրաստանը Ռիգայի գագաթաժողովից, եթե արդեն ակնհայտ է, որ վրացիների առաջնային ցանկությունը չի կատարվելու, Կախա Գոգոլաշվիլին արձագանքեց․«Ցավոք, կոնկրետ ակնկալիքներ չկան: Գագաթաժողովն ինքնին չունի հատուկ նպատակներ: Ամենայն հավանականությամբ, սա չի լինի Արևելյան գործընկերության պատմության մեջ էական նշանակություն ունեցող գագաթաժողով: Հնարավոր է` ընդհանուր քննարկումներ լինեն, երկրների ղեկավարներն էլ մտքերի փոխանակում անցկացնեն. արդեն ակնհայտ է, որ այլ բան չի լինելու»:
Ընդհանուր առմամբ, մեր զրուցակիցն ընդգծեց, որ շատ կարճ ժամանակ է անցել այն ժամանակվանից, ինչ Վրաստանը ստորագրեց Եվրամիության հետ Ասոցացման համաձայնագիրը, և հիմա խոսել այն մասին, որ Եվրամիությունն իրեն ամբողջությամբ չի արդարացրել, ճիշտ չի լինի: «Իսկապես կարճ ժամանակ է անցել կոշտ գնահատականներ տալու համար: Հասկանալի է նաև, որ այդ պայմանագրերը կարճաժամկետ չեն, հնրավորություններն իրագործելու համար ժամանակ է հարկավոր: Ամեն ինչ կախված է նրանից, թե Վրաստանն ու Ուկրաինան, Մոլդովան ինչպես կօգտվեն հնարավորություններից: Անկախ բոլոր դժվարություններից և որոշ ակնկալիքների չարդարացումից սա հնարավորություն է մեր երկրների համար` դուրս գալ կյանքի բոլորովին այլ փուլ, քաղաքակիրթ աշխարհ: Ոչ ոք չի ակնկալում շատ արագ փոփոխություններ, մեր երկրներում առկա խնդիրների շուտափույթ լուծումներ»,- եզրափակեց մեր զրուցակիցը՝ միևնույն ժամանակ հույս հայտնելով, որ ստորագրված Ասոցացման համաձայնագրի դրական կողմերն առաջիկայում կերևան:
Չնայած Վրաստանում դեռևս պահպանված` եվրաասոցացման նկատմամբ դրական ակնկալիքներին՝ նույն պատկերը չի կարելի տեսնել Մոլդովայում: Մոլդովան Եվրամիության հետ ունի ազատ վիզային ռեժիմ, սակայն այն բոլոր խնդիրները, որ կային Մոլդովայում նախքան եվրաասոցացումը, չեն լուծվել նաև համաձայնագիրը ստորագրելուց հետո:
Մոլդովայի խորհրդարանի պատգամավոր, քաղաքագետ Բոգդան Ցիրդյան «Ռեգիոն» հետազոտական կենտրոնի նախաձեռնած ասուլիսի ընթացքում, հայ լրագրողների հետ քննարկելով Ասոցացման համաձայնագրից հետո Մոլդովայում ստեղծված իրավիճակը, մասնավորապես` պատասխանելով այն հարցին, թե մերձդնեստրյան հարցի կարգավորման շուրջ ասոցացման համաձայնագրի ստորագրումից հետո առաջընթաց գրանցվե՞լ է, թե՞ ոչ, ասաց․«Առաջընթաց չի գրանցվել, ընդհակառակը` լարվածությունը սրվեց»:
Դիտարկմանը, թե այդ դեպքում ինչպե՞ս է պատկերացնում Մոլդովայի եվրաինտեգրացիոն հեռանկարները՝ հաշվի առնելով այն հանգամանքը, որ Մոլդովան ունի չլուծված՝ մերձդնեստրյան և Գագուազիայի խնդիրները, քաղաքագետը պատասխանեց. «Եվրաինտեգրում հնարավոր չէ, երբ գոյություն ունի տարածքային բաժանում և կոնսենսուսի բացակայություն»:
