««Հիմնադիր խորհրդարանը» արդեն 2 տարի հանդես է գալիս իր ծրագրով՝ ձևավորել ալտերնատիվ, լեգիտիմ իշխանության մարմին: Այդ առումով հասել է որոշակի իրավիճակի. ըստ իրենց հրապարակած տեղեկությունների՝ մոտ 16000 քաղաքացի արդեն տվել է ինչ որ ձևով իրենց լիազորագրերն այդ կառույցին»,- «Առաջին լրատվական»-ի հետ զրույցում նման տեսակետ հայտնեց քաղաքագետ Անդրիաս Ղուկասյանը:
Նրա խոսքերով՝ «Հիմնադիր խորհրդարան»-ին կամ կհաջողվի Հայաստանում ապստամբության սկզիբ դնել կամ ոչ, դա պարզ կլինի արդեն մոտակա շաբաթների ընթացքում: «Այս ժամանակահատվածը լարված է լինելու, մենք տեսանք, որ որոշ քաղաքական գործիչներ կոչ արեցին իշխանությունը յուրացնողներին դիմել ագրեսիվ մեթոդների»,- ասաց նա:
Ղուկասյանի խոսքերով՝ այսօր երկրում կա իշխանության յուրացում, և այն մարդիկ, ովքեր պաշտոններ են զբաղեցնում, կատարել են հանցանք՝ վերցրել են իրենց ձեռքը իշխանության մենաշնորհը․«Այդ մարդիկ իրավունք ունե՞ն ապրիլի 24-ը ներկայացնել ամբողջ աշխարհի առաջ»,- ասաց նա՝ ի պատասխան մեր այն հարցին, թե ապրիլի 24-ին՝ Ցեղասպանության 100-ամյա տարելիցին, բողոքի ակցիաներ սկսելն ինչքանո՞վ է նպատակահարմար և ճիշտ:
«Բախում լինելու է՝ դա ակնհայտ է: Մենք հասանք մի իրավիճակի, երբ ապրիլի 24-ը չի հանդիսանում պատճառ, որպեսզի քաղաքական հակառակորդները կարողանան այդ օրը զենքերը ցած դնել: Կարելի է սպանել այդ մարդկանց, գցել բանտ, բայց անհնար է այդ իրողությունը վերացնել»,- ընդգծեց նա:
Հարցազրույցն ամբողջությամբ՝ մեր տեսանյութում: