Գիտնականները հայտարարել են, որ պարբերաբար համակարգչային խաղեր խաղացողները ոչ միայն տեսողական տեղեկատվություն ընկալելու մեծ ունակությամբ են օժտված, այլև ավելի արագ են նոր բաներ սովորում, եթե դա տեսողական ձևով է ներկայացված: Այս մասին հոդվածը հրապարակվել է PLoS ONE ամսագրում:
Ուսումնասիրությանը մարդկանց երկու խումբ է մասնակցել: Առաջին խմբի անդամները խաղացողներ են եղել, իսկ ահա երկրորդ խմբի անդամները խաղերով չեն հետաքրքրվել: Կամավորներին առաջարկվել է երկու տարբեր տիպի առաջադրանքներ կատարել, որոնք ուղղված են ցուցադրված պատկերներում թերությունների հայտնաբերմանը:
Փորձի արդյունքները ցույց են տվել, որ երկու խմբերն էլ երկու օրում բարելավել են առաջադրանքի կատարման արագությունը, սակայն խաղացողներն ավելի լավ են կատարել այն առաջադրանքները, որոնք կապված են տեսողական տեղեկատվության հետ: Ուսումնասիրողները պնդում են, որ նրանց աշխատանքը ցուցադրում է, որ համակարգչային խաղերը կարող են ոչ միայն հետաքրքիր, այլև օգտակար լինել: