ՌԴ Պետդումայի խոսնակ Սերգեյ Նարիշկինի` Հայաստան կատարած այցի շրջանակներում Հայաստանի խորհրդարանում բացվեց «Մեծ հաղթանակի ուղիները» խորագրով գեղանկարների ցուցահանդեսը: Ցուցահանդեսին ներկայացված էին խորհրդային գեղանկարիչների 16 ստեղծագործություններ, որոնք հիմնականում նվիրված են Երկրորդ համաշխարհային պատերազմում ԽՍՀՄ տարած հաղթանակին:
Ցուցահանդեսի բացմանը պարզ դարձավ, որ այս կտավները ընտրվել են գործարարներ և բարերարներ Ռուբեն Վարդանյանի, Վլադիմիր Ավետիսյանի և Վլադիմիր Նեկրասովի կողմից «To Armenia with Arts» հիմնադրամի տրամադրած` գեղանկարների հավաքածուից:
Ցուցահանդեսի բացմանը մասնակցած Նարիշկինին դուր էր եկել ներկայացված գեղանկարներից մեկը, որը, ըստ ցուցահանդեսի կազմակերպիչ` «Հայաստանի զարգացման նախաձեռնություններ» հիմնադրամի ղեկավար Արմեն Գևորգյանի, Պետդումայի խոսնակին հիշեցրել էր իր հարազատ Սանկտ Պետորբուրգը:
Պարզվում է, որ Նարիշկինի ուշադրությունը գրավել է ոչ միայն Սանկտ Պետերբուրգը հիշեցնող գեղանկարը: Ցուցադրության էր ներկայացված ռուս գեղանկարիչ Լոմակինի «Էլբա 1945» ստեղծագործությունը, որը «Հանդիպում Էլբայի վրա» հայտնի լուաանկարի գեղարվեստական արտապատկերում է: Նկարում ներկայացված է այն պահը, թե ինչպես առաջին անգամ հանդիպեցին ամերիկացի և խորհրդային զինվորականները, ովքեր այդ ժամանակ դաշնակիցներ էին:
Բայց 1945թ. ապրիլի 25-ից (այդ օրն է տեղի ունեցել սույն պատմական հանդիպումը) անցել է գրեթե 70 տարի, և այդ ընթացքում Ռուսաստանի և ԱՄՆ-ի հարաբերություններում արմատական փոփոխություններ են տեղի ունեցել: Այս երկրները ոչ միայն այլևս դաշնակիցներ չեն, այլ ընդհակառակը` բացահայտ թշնամիներ, այն աստիճանի, որ ԱՄՆ իշխանությունները չեն թաքցնում, որ նպատակ են դրել իշխանությունից հեռացնել ՌԴ նախագահ Վլադիմիր Պուտինին և նրա վարչակարգը: Իսկ դա նշանակում է` նաև Պետդումայի խոսնակ Սերգեյ Նարիշկինին, ով պուտինյան իշխանության կարկառուն ներկայացուցիչներից է: Բացի այդ` ԱՄՆ իշխանությունները բոյկոտում են մայիսի 9-ին Պուտինի կողմից Մոսկվայում հաղթանակի 70-ամյակին կազմակերպած միջոցառումները` դրանք պատճառաբանելով Ռուսաստանի կողմից Ղրիմի անեքսիայով և Արևելյան Ուկրաինայում անջատողականներին աջակցությամբ:
Ո՞ւմ մտքով է անցել ընտրել այս նկարը և Նարիշկինին հիշեցնել 70-ամյա վաղեմության այն վիճակը, երբ ամերիկացի զինվորները ձեռք էին մեկնում ռուս զինվորներին` դրանով փորձելով հասկացնել, որ խնդիրը ոչ թե ամերիկացի և ռուս ժողովուրդների միջև է, այլ Ռուսաստանում առկա ռեժիմն է:
Ըստ ականատեսների` Նարիշկինը խիստ ազդվել է այդ ստեղծագործությունից և հետաքրքրվել, թե ի՞նչ սկզբունքով է ընտրվել նկարը: Դժվար է ասել, թե ինչ բացատրություն են տվել Պետդումայի խոսնակին, բայց, որ նա այդ կտավի ցուցադրությունը համարել է վատ քաղաքական հոտառության նշան, անվիճելի է: Թեև Նարիշկինը տեսնում է, որ, չնայած ռուսական զգուշացումներին, Հայաստանը շարունակում է «և, և»-ի քաղաքականությունը: