Վրաստանի նախագահ Գեորգի Մարգվելաշվիլին խոստովանել է, որ պատրաստ է եղել իր վրա ճնշման պատճառով հրաժարական տալ: Այս մասին նա ասել է «Ռուսթավի 2» հեռուստաալիքի եթերում:
«Ես որոշակի շրջանում պատրաստ էի հրաժարական տալ… Ինձ վրա ճնշումը շարունակվում է արդեն ամբողջ տարին, և դա կուլուարային գործընթաց չէ: Դա բացահայտ քննադատություն է իմ հասցեին, բայց հիմա ես դրան հանգիստ եմ նայում»,- ասել է Մարգվելաշվիլին:
Միաժամանակ, նա նշել է, որ քաղաքական գործիչները մոռանում են, որ ինքը որևէ կուսակցության անդամ չէ:
«Հաճախ քաղաքական գործիչների հայտարարություններն անցնում են սահմանագիծը, և նրանք չափազանց ջերմեռանդորեն են վերաբերվում իմ հայտարարություններին, իսկ ես բոլորի նախագահն եմ, ոչ թե` մեկ կուսակցության»,- նշել է Մարգվելաշվիլին:
Վերջերս Վրաստանի նախագահի և կառավարության փոխհարաբերությունները սրվել են: Այդ սրումն առավել ակնհայտորեն երևաց մարտի 31-ին Վրաստանի խորհրդարանում երկրի ղեկավարի ելույթի ժամանակ. նիստերի դահլիճում Վրաստանի կառավարությունից ոչ ոք ներկա չէր:
Միաժամանակ, Մարգվելաշվիլին բազմիցս քննադատության է ենթարկվել Վրաստանի նախկին վարչապետ Բիձինա Իվանիշվիլիի և նրա քաղաքական դաշնակիցների կողմից: