Թուրքական լրատվամիջոցներն արշավ են սկսել Ֆրանսիայի խորհրդարանի պատգամավոր Վալերի Բուայեի դեմ, որը Հայոց ցեղասպանության ժխտումը քրեականացնող օրինագծի առաջամարտիկներից է։
Թուրքական «Անադոլու» լրատվական գործակալությունը գրում է, որ Բուայեն այս անգամ Ֆրանսիայի Ազգային ժողովին ներկայացրած ասորիների ցեղասպանության վերաբերյալ օրինագծի վրա աշխատելիս ոչ թե սեփական ուսումնասիրություններն է արել, այլ պարզապես նյութերը վերցրել է ինտերնետային կայքերից, մասնավորապես, «Վիքիպեդիա» համացանցային հանրագիտարանի բազայից։
Բուայեին որպես հայամետ, թուրքատյաց գործիչ ներկայացնող թուրքական ԶԼՄ-ները նշում են, որ Բուայեն իր վերջին հարցազրույցներից մեկում ընդունել է, որ օրինագիծը մշակելիս իսկապես օգտվել է «Վիքիպեդիայից»։
«Անադոլուն» հոդվածի վերջում հիշեցրել է, որ Վալերի Բուայեն նախկինում Հայոց ցեղասպանության ժխտման համար քրեական պատիժ սահմանող օրինագծեր է ներկայացրել Ֆրանսիայի խորհրդարանում։