Առաջին ատյանի դատարանի որոշմամբ 5 տարվա ազատազրկման դատապարտված դերասան Վարդան Պետրոսյանի գործով վերաքննիչ բողոքը ՀՀ վերաքննիչ դատարանը կքննի վճռաբեկության կարգով: Այս մասին բողոքի քննության առաջին նիստին հայտարարեց նախագահող դատավոր Հենրիկ Տեր-Ադամյանը: Դատական նիստը սկզբում ընդմիջվեց 15 րոպեով՝ հաշվի առնելով այն հանգամանքը, որ տուժող կողմի փաստաբան Ռուբեն Բալոյանը ուշանում էր, և տուժող կողմը չցանկացավ առանց նրա սկսել դատաքննությունը:
Նշենք, որ դատական նիստին չէր մասնակցում Վարդան Պետրոսյանի ֆրանսիացի պաշտպան Մարի Լոռ Դոզեն՝ ծանուցումը չստանալու պատճառով:
Ընդմիջումից հետո Վարդան Պետրոսյանի պաշտպանները դատը հետաձգելու միջնորդություն ներկայացրին: Պաշտպան Նիկոլայ Բաղդասարյանը նկատեց, որ միջնորդությունը ներկայացվում է, որպեսզի ֆրանսաբնակ փաստաբաններ Մարի Lոռ Դոզեն և Ժիրայր Չոլակյանը կարողանան ստանալ առաջին ատյանի դատարանի վճռի թարգմանված տարբերակը և դիրքորոշում հայտնեն դրա վերաբերյալ։ Բացի այդ, հնարավոր է, որ ֆրանսիացի փաստաբանը Վարդան Պետրոսյանի հետ քննարկելուց հետո որոշի բողոք ներկայացնել, բողոքարկման ժամկետը դեռ չի լրացել:
Միջնորդությունը բավարարվեց, քանի որ մեղադրող կողմը առարկություն չուներ:
Նշենք նաև, որ մինչ այս՝ պաշտպանական կողմը շեշտում էր, որ բողոք ներկայացնելով՝ ըստ էության կերկարաձգվի Վարդան Պետրոսյանի կալանքի մեջ մնալը, քանի որ այս միջնորդությամբ մինչև ապրիլի 21-ը հետաձգեցին գործի քննությունը։
Լրագրողները նիստից հետո փաստաբան Նիկոլայ Բաղդասարյանից հետաքրքրվեցին, թե այս քայլով ինչ տակտիկական խնդիր են լուծում, և այն կարո՞ղ է կապ ունենալ համաներման հետ: Նիկոլայ Բաղդասարյանը ասաց, որ այս պահին այդ ուղղությամբ չի կարող որևէ բան ասել, բայց նման կարգավիճակում հայտնված անձանց ձեռնտու է սպասել համաներմանը:
Մանրամասները՝ տեսանյութում։
Լուսանկարը` PAN Photo-ի
