«Գյուղացուն ոչինչ չեն տալիս, մի բան էլ վերցնում են, ամեն տեղ խոշորներն են, գյուղատնտեսության մեջ էլ, հենա, Քոչարյանի տղան է ցանել բոլոկի, բողկ, հողերն առել՝ ջերմոցներ ա սարքել։ Շատ էժանով բոլոկի է տալիս, էլ գյուղացին չի կարողանում իր ցանածն իրացնել»,- «Առաջին լրատվական»-ի հետ զրույցում նշեցին Արարատի մարզի Բուրաստան, Շահումյան գյուղի բնակիչները:
Նրանց պնդմամբ՝ Արտաշատ համայնքի վարչական տարածքում գտնվող «Գրինհաուզ» համալիրը պատկանում է Ռոբերտ Քոչարյանի որդուն:
Այս տարի ջերմոցային համալիրի արտադրանքը մեծ մասամբ ոչ թե արտահանվում է, այլ ներքին շուկայում է իրացվում։
«Խեղճ գյուղացին ինչ անի, ամեն ինչը իրանց ձեռն ա, մենք ստիպված աշխատում ենք, որ երեխա պահենք»,- նշեցին նրանք:
Գյուղացիները նկատեցին, որ մյուս տարի արդեն բողկ էլ չեն ցանի. եթե խոշորն է սկսել բարձրակարգ տեխնոլոգիաներով մեծաքանակ վաճառել, գյուղացու անշուք ապրանքն արդեն չի իրացվի:
Գյուղացիներին զայրացնում է այն, որ «Գրինհաուզ» համալիրի ԱԱՀ-ի վճարման ժամկետը հետաձգված է մինչև 2017թ. հուլիսի 10-ը: 30 հա ջերմոցային տնտեսությանը տրված են նաև այլ արտոնություններ՝ սարքավորումների ներմուծում առանց մաքսատուրքերի և այլն։ «Դրա համար էլ մարդիկ թողնում գնում են, ամեն ինչն իրենցն է, հսկայական հողատարածք ենք մշակում, բայց ոչինչ չենք կարողանում ունենալ, իսկ իրենք…»,- ասացին գյուղացիները:
Գյուղացիները նաև դժգոհեցին՝ ասելով, որ ջերմոցային տնտեսությունը հիմա էլ լոլիկ կաճեցնի, գյուղացին դեռ չի հասցնի իր բերքը շուկա տանել, խոշորը արագ իր բերքը կիրացնի:
Մանրամասները՝ տեսանյութում։