Թուրքական «Զաման» պարբերականի թղթակից Սերվեթ Յանաթման այցելել է հայ-թուրքական սահմանին մոտ գտնվող Բագարան գյուղ, որտեղ էլ զրուցել է գյուղի ընտանիքներից մեկի հետ:
Յանաթման նշում է, թե Հայաստան է ժամանել «Արարատի ստորոտին» մեդիա ֆորումին մասնակցելու համար, ապա որոշել է նաև շրջայց կատարել Հայաստանի և Թուրքիայի սահմանին մոտ հայկական բնակավայրեր:
Բագարանում Յանաթման զրուցել է 65-ամյա Վալերայի հետ, ում հետ զրույցն էլ ներկայացրել է իր հոդվածում:
«Հայաստանում շարունակվում են 1915-ի դեպքերի (Հայոց ցեղասպանության.- խմբ.) հետ կապված նախապատրաստությունները: Այցով Հայաստանում էինք: Այցելեցինք հայ-թուրքական սահման, որտեղ էլ զրուցեցինք Վալերայի հետ: Վալերայի երազանքն է Ախուրյան գետում ձկնորսությամբ զբաղվել»,- գրում է հոդվածագիրը և շարունակում. «Վալերան բնակվում է Բագարանում, որը Ախուրյանի հայկական ափին է: Հայկական գյուղի դիմաց՝ Թուրքիայի հատվածում, Կարսի Դիգոր շրջանի Հալըքըշլաք գյուղն է»:
«Այնուհետև Վալերան ծանոթացնում է իր մոր հետ՝ 87-ամյա տիկին Գոհարի հետ: Վալերան մի փոքր թուրքերենի է տիրապետում: Ասում է, որ եկել են Գանձակից, այդ պատճառով թուրքերենի և ադրբեջաներենի խառնուրդ մի լեզվի է տիրապետում»:
«Վալերան խնդրում է, որպեսզի գրեմ այն մասին, որ գետում հնարավոր չէ ձուկ որսալ, իսկ նա շատ է սիրում: Ասում է՝ միգուցե իմ գրելուց հետո իր ձայնը լսելի լինի, և կարողանա իր երազանքը կյանքի կոչել, քանի որ ձուկ շատ է սիրում: Ասում է Վալերան և մեզ հրաժեշտ տալիս»:
«Հայկական և թուրքական գյուղերն այնքան մոտ են, որ աքաղաղի ձայնը լսելի է, անգամ գյուղերի սահմանին կանգնելով կարելի է միմյանց հետ բարձր ձայնով զրուցել»,- հավելում է հեղինակը: