Անկարան և Վաշինգտոնն ընդդիմադիր Սիրիական ազատ բանակի զինվորների ուսուցումը կսկսեն մայիսին: RIA Novosti-ի հաղորդմամբ՝ այս մասին երեքշաբթի օրը հայտարարել է Թուրքիայի պաշտպանության նախարար Իսմեթ Յըլմազը:
Փետրվարին ԱՄՆ-ը և Թուրքիան համաձայնագիր են ստորագրել Սիրիայի ազատ բանակի գրոհայիններին ուսուցանելու մասին` ԴԱԻՇ-ի (Իրաքի և Շամի իսլամական պետություն) դեմ պայքարելու համար: Ծրագիրը ենթադրում է 1 տարվա ընթացքում Սիրիական ազատ բանակի 2 հազար անդամների ուսուցում: Զենք և ռազմամթերք կտրամադրի ԱՄՆ-ը, ուսուցումը կանցկացնեն թուրք և ամերիկացի զինվորականները:
ԱՄՆ-ը ենթադրում է 3 տարում ուսուցանել և սպառազինել Սիրիական ազատ բանակի 15 հազար անդամի: Բացի Թուրքիայից՝ ծրագրին կմասնակցեն նաև Սաուդյան Արաբիան և Կատարը:
«Մենք ակնկալում ենք, որ ծրագիրը կմեկնարկի մայիսին: Մենք որոշել ենք Սիրիական ազատ բանակի մարտիկներին պատրաստելու տեղը: Շարունակվում են ամերիկացի գործընկերների հետ բանակցությունները մարզվողների անձնակազմի վերաբերյալ»,- Անկարայում լրագրողներին ասել է Յըլմազը:
Նա հավելել է, որ բացառված չէ այդ ծրագրին Մեծ Բրիտանիայի մասնակցությունը: Յըլմազը հերքել է ԶԼՄ-ների տեղեկությունը, որ մարզումների վայրերից մեկը կլինի Սիրիայի հետ սահմանակից Հաթայ նահանգը: