Թուրքիայում ձախ ծայրահեղական «Հեղափոխական ազգային-ազատագրական ճակատ» (DHKP-C) խմբավորման անդամները Ստամբուլի դատարանում պատանդ են վերցրել դատախազին: Այս մասին հաղորդում է Reuters-ը: Խմբավորումը տարածել է լուսանկար, որտեղ երևում է, թե ինչպես են պատանդի գլխին ատրճանակ պահել:
Դատարանի շենքից քաղաքացիական անձինք տարհանվել են, ներս են մտել հատուկ նշանակության ջոկատները:
DHKP-C-ն իշխող «Արդարություն և զարգացում» կուսակցությանը մեղադրում է 15-ամյա դեռահաս Բերքին Էլվանի սպանության մեջ, որը վիրավորվել էր 2013թ. Գեզի այգու հակակառավարական ցույցերի ժամանակ: Պատանդ վերցված դատախազը զբաղվում էր հենց Էլվանի մահվան հանգամանքների հետաքննությամբ:
Զինյալները պահանջում են, որպեսզի սպանության մեջ մեղադրվող ոստիկանը հեռուստատեսությամբ խոստովանի իր մեղքը: Բացի այդ, նրանք ցանկանում են, որ սպանությանը հանցակից ոստիկաններին դատեն «ժողովրդական դատարանները», իսկ Էլվինի զորակցության ցույցերի դուրս եկած մյուս բողոքարարների վրայից մեղադրանքները հանվեն:
Հիշեցնենք, Էլվանը 2013թ. հունիսին վիրավորվել էր գլխից, երբ դուրս էր եկել՝ խանութ գնալու: 9 ամիս կոմայի մեջ մնալուց հետո նա մահացել էր: Նրա ծնողները հայտարարել են, որ Թուքիայի իշխանությունների գործողությունների դեմ կդիմեն Մարդու իրավունքների եվրոպական դատարան, քանի որ հենց կառավարությանն են մեղավոր համարում նրա մահվան համար:
DHKP-C-ն ահաբեկչական կազմակերպություն է ճանաչված ԱՄՆ-ում, ԵՄ-ում և Թուրքիայում: Այս խմբավորման անդամներն են կանգնած 2013թ. Անկարայում ամերիկյան դեսպանատանը իրականացված ահաբեկչության ետևում:
